Shillong, Rymphang 08: Kum shi bynta jong ka National Integration Project lyngba ka Military Civic Action, 35 ngut ki khynnah kiba don jingduna ha ka dkhot met bad 4 ngut ki nongtrei jongka Ferrando Rehab Centre, Agartala hynne ka sngi, kila leit ban jngohkai iaka Raj Bhavan, Shillong.
Watla u Lat ka jylla u Brig. (Dr.) B. D. Mishra (Retd.) ym shim la don lang hynrei la pdiang sngewbha ia kitei da u Dr. B.D.R Tiwari, Commissioner & Secretary jong u Lat bad ai khublei kyrpang na ka liang jong u Lat ka jylla.
Une u heh ophisra ula ialam kai ia katei ka kynhun ban peitkai iaka jinglong jingman bad ia ki jingdon jingem hapoh ka Raj Bhavan bad kum ka dak ban sah jingkynmaw halor kane ka jingwan jngohkai la ai da ki jingai sngewbha sha katei ka kynhun.
Kitei ki khynnah kin pynlut por 6 sngi ban leit jngohkai ia ki jaka kiba don ha Silchar, Guwahati bad Shillong ha kaba kin leit ban jngoh ia ki Museums, War Memorials, Science Cities bad kiwei kiwei ki jaka jngohkai kiba pawnam.
Ia katei ka prokram ialam kai ia kitei ki khynnah la pynbeit da ka 18 Assam Rifles hapoh ka kynhun jong ka IGAR(E).
