Guwahati, Naiwieng 04 :Ka Mizoram ka wan ha ka kyrdan kaba ar ha kaba iadei bad ka jingbiang ha ka jingdon jong ki khynnah bad ki nonghikai (pupil-teacher ratio (PTR) hapoh ka ri (kata iwei i nonghikai na ka bynta man ka 13 ngut ki khynnah skul) hadien jong ka Sikkim (iwei i nonghikai na ka bynta 10 ngut ki khynnah skul), kane ka long katkum ka kaiphot lyngba ka unified district information system for education (UDISE) plus 2021-22 ba la pyllait da ka tnat pule puthi ka sorkar pdeng hynnin ka sngi Palei.
Kane ka jingkiew ha ka jingiabiang hapdeng ki nonghikai bad ki khynnah ha kine ki artylli ki jylla lah ban shim ruh ba ka dei namar ka jingduna jong ki khynnah kiba leit skul. Katba ka Sikkim ka dei kaba duna tam ha kaba iadei bad ka jingdon jong ki khynnah kiba leit skul napdeng baroh ki jylla (1.35 lak), ka jingdon ki khynnah kiba pule ha Mizoram ka long tang 3.09 lak, kaba wan ha ka kyrdan kaba lai hapoh ka ri.
Ka kaiphot kala ong ruh ba ka Sikkim ka don 13,613 ngut ki khynnah ha ki 1,259 tylli ki skul, kata haba shim kyllum ki don 11 ngut ki nonghikai na ka bynta 108 ngut ki khynnah skul ha kawei pa kawei ka skul.Ha Mizoram ha ki 3,911 tylli ki skul ki don 23,366 ngut ki nonghikai bad bad kaba shim kyllum ki don hynriew ngut ki nonghikai bad 79 ngut ki khynnah skul ha kawei pa kawei ka skul.
Katkum ka kaiphot, ha ka ri baroh kawei haba shim kyllum ki don iwei i nonghikai na ka bynta 28 ngut ki khynnah skul bad ka jingdon ki khynnah kiba leit skul ka don 26.52 klur.
Napdeng kiwei pat ki jylla ka thain shatei lammihngi (Northeast), ka Assam ka don 60,859 tylli ki skul kata kaba bun tam hapoh ka thain.Kane ka sakhi ka don haduh 75.44 lak ki khynnah skul.Da ka jingdon jong 3.52 lak ki nonghikai, kumta ruh haba shim kyllum iwei i nonghikai na ka bynta 21 ngut ki khynnah skul.Ka jingdon ki nonghikai ha kawei pa kawei ka skul ha Assam ka ia ryngkat haba shim kyllum bad kiwei pat ki skul hapoh ka ri kaba long hynriw ngut ki nonghikai, katba ka jingdon jong ki khynnah kiba rung skul kalong kumba 124 ngut ha kawei pa kawei ka skul.
Baroh ki jylla ka thain Northeast ki kham biang haba shim kyllum halor ka jingdon jong ki nonghikai bad ki khynnah skul haba ia nujor bad ka jingdon ha Delhi kaba long da 30, hynrei ki riewshemphang kila ong ba ka thain Northeast ki donkam shuh shuh ia ki nonghikai hapoh ki skul na ka bynta ban pynleit jingmut na ka bynta ki khynnah.Lait noh na ka Nagaland, baroh ki jylla ka thain NE ki don duna ia ka 10 ngut ki nonghikai, bad ka Meghalaya ka wan ha ka kyrdan kaba hatrai eh, kata tang sawngut ki nonghikai ka kawei kawei ka skul.
