Shillong Risaw 19: U Bah Donbor Rumnong ula wanrah nam bad burom iaka jylla bad iaka ri hi baroh kawei, da kaba khur iaka takma rnong haka jingiakob pyni dohksah kaba la tip kum ka Mr Asia Pacific kaba la long ha Vietnam haka 14 bad 15 tarik mynta u bnai.
Ki paid nongshongshnong ka Mawlai, ki bahaïing bahasem bad kiwei kiwei kila ia mih ha surok ban pdiang sngewbha ia u Bah Donbor uba la wanpoi hynne ka sngi Balang haka nongbah Shillong kum u nongjop ha katei ka jingiakob.
U Bah Donbor ula iathuh ba ha katei ka jingiakob kaba ula wan ban iashimbynta kila don haduh 200 ngut ki nongiashimbynta na ki 21 tylli ki Ri jong ka Dewbah Asia bad ka ri Australia bad New Zealand bad ka jingiakob ka long ha ki 3 tylli ki kyrdan kata ka Open Body Building, Mens Physique bad Classic.
“Nga la iakhun ha ka kyrdan Mens Physique bad iaka takma ksiar la iohrah da u rangheh ksah na Malaysia bad u rangheh ksah na Vietnam ula ioh iaka takma rupa bad nga la ioh iaka takma rnong” la iathuh u Bah Donbor.
“Haba nga la iohi ia ka met ka phad jongki nongiashimbynta na kiwei pat ki ri ki dei kiba heh briew, nga la sdang ban duh jingkyrmen hynrei u President jong ka Word Fitness Organisation ula ong, ba udei ban shaniah beit ialade bad ban aiti beit ha u Blei bad ban hun beit ia kaei kaban jia ha ka jingiakob. Haba nga ioh iaka takma rnong nga dap da ka jingsngewhun bad ngam don kano kano ka jingdiaw namar uba wan ba nyngkong bad uba wan baar ki dei hok shisha ban ioh ia kitei ki takma” ong u Bah Donbor.
Ula pynpaw iaka jingsngewnguh ia u Blei uba la ai ia u ka met kaba koit ba khiah, iaka ïing ka sem, ka Kur kaba kyrshan met bad mynsiem ia u bad ia u Bah Aubrey Laloo uba ai jinghikai ia u ban poi syndon sha kane ka thong.
U Bah Donbor ha u snem 2018 u la ioh rah iaka nam Mr North East ha u 2018 bad ha u snem 2019 ula wan ba nyngkong haka Mr India bad lyngba ka jingioh iaka takma ha katei ka jingiakob yn ioh ban leit iashimbynta haka World Championship.
“Namar ba nga la ioh iaka takma, nga la shah jied ban iashimbynta haka World Championship ban long ha Indonesia mynta u snem, hynrei namar ba ka por kala khim palat kumta nga jied ban leit iakhun noh iaka World Bodybuilding Championship kaban long ha ri Germany ha u snem ban wan, khnang ba ngan ioh ban pynkhreh bad pyntbit kham bha shuh shuh ialade” ong u Bah Donbor.
“Ka jingialehkai pyni dohksah ka dei ka jingialehkai kaba bunsien ki hap ban pynlut iaka pisa haka bam haba ki leit iashimbynta ha ki jingiakob pyni ksah. Ia ka ksah kpoh la shna haka jaka bam ym ha ka jaka lehkai (Gym) namar ka jaka ialehkai ka shu pynoh shrong ia ka met ka phad bad kadei ka bam kaba pynneh iaka ksah bad ngi dei ban bam ia ki jingbam kiba tei kum ka dohsyiar, pylleng bad ki jhur ki jhep da kaba shu phon” ong u rangheh ksah ka ri.
U la pynshlur ia ki samla ba kin ialehkai ha ki Gym bad kiwei kiwei ki jait jingialehkai namar ka pynlong ia ki ba kin lait na kino kino ki jingsniew.
“Ka jingitynnad ka jong nga ia u Arnold Schwarzenegger kala pynlong ia nga ban kwha ban ialeh iaka Bodybuilding bad ia kane nga la pynpaw naduh ka por kaba nga dang rit ha I pa jong nga ba nga kwah ban long kum u Arnold” la ong u Bah Donbor.
