Nongpoh, Nailur 29: Ka Ri Bhoi District Cricket Association (RBDCA) kan pynlong mynta ia ka jingwad ia ki heprit bad ki samla kiba donsap ban ialehkai Cricket napoh ka District ban ioh ai ia ki jinghikai pyntbit ba kin mihkhmat ia ka District.
Ka RBDCA kan pynlong da camp ha Byrnihat, Umsning bad ha Nongpoh ban wad ia ki donsap ialehkai cricket kiba naduh ka 14 snem ka rta, ka 16 snem ka rta bad kiba la 19 snem ka rta.
Ia kane la pyntip da u President bad Secretary ka RBDCA Bah Rayonald Kharkamni bad Bah Micheal Kharhunai hynne ka sngi palei haba iakren bad ki nongthoh khubor ha Nongpoh.
La pyntip ba ha Byrnihat, yn pynlong ia kane ka camp ha madan ialehkai jong ka shnong Lumnongrim ha ka 1 tarik bad 2 tarik u Risaw, ha Umsning pat yn pynlong ha ka madan ialehkai jong ka Umsning Patarim ha ka 21 bad 22 tarik Risaw katba ha Nongpoh yn pynlong ha madan ialehkai jong ka Umbuda ha ka 27, 28 bad 29 tarik Risaw.
La bthah ba ki heprit bad ki khun samla, kynthei bad shynrang ki ban wan ban iashim bynta, kidei ban wanrah ia ki kot ki sla ba kynthup ia ka Birth Certificate, School Certificate bad ka dur Passport na ka bynta ka registration bad na ka liang ka RBDCA kan sa pynbiang ruh ia ka bam sngi na bynta jong baroh kito kiba wan ban iashimbynta ha kitei ki lympung ki ban sdang naduh ka por 9 baje mynstep ha kitei ki lai tylli ki jaka.
