Shillong, Risaw 09: U Mewankitbok Kharpuri u la ioh ia ka hat trick, pynban ka Meghalaya ka la mad ia ka nam rem kaba long da lai wiket ha ka lympung ialehkai jong ka U-19 Vinoo Mankad Trophy 2025-26, ba la long ha Chandigarh ha ka sngi Palei.
Haba phai sha kane ka jingiakhun, ka Sikkim hadien ba ka la jop ia ka jingkynting pisa (toss) ka la ailad ia ka Meghalaya ba kan wan ba kan tied nyngkong ha kaba ka la lah ba kan kamai 99 ron na ki 36.4 ober, ia kaba wat lada ka Sikkim ka la kham shem jingeh ba kan lah ban wan beh ia kane ka thong, pynban ha kaba kut kan jop pat da 3 wiket na ki 20.5 ober.
Ha kane ka jingiakhun, u Mewankitbok u la lah ban lam khmat ia la ka kynhun ban khur 4 wiket naka bynta 48 ron na ki 10 ober, kaba kynthup lang ia ka hat trick, kaba la wan ba wan mih paw ha ka ober kaba saw jong ka pali wan tied ka Sikkim.
Ki lai tylli ki wiket ba u Mewankitbok ki kynthup ia wiket jong u Deepak ba la lah ban kamai 13 ron, bud pat sa ia u kapten ka kynhun u Denree bad Sahil. Katba u Gaurav u la ioh ban khur 3 wiket naka bynta 16 ron na ki 4.5 ober
Katba na ka liang ki batsman ka Meghalaya, u Gaurav Narleng u la long u shot shan ia la ka kynhun hadien ba u la ieng iakhun ban kamai haduh 33 ron na ki 36 tylli ki bol, ba kynthup lang ia hynriew tylli ki booundary, ia kaba la bynrap lang da ka 16 ron na u Angkit Tamang bad 11 ron na u Benedict Jones Makdoh ban seng nongrim ia ka jingkamai ron paralok kaba 30 ron hapdeng jong ki.
Pynban hapdeng kat kane ka jingialehkai bha ki player ka Meghalaya, ka Sikkim ha kaba kut ka la lah ban jam sha u line ka jingjop kaba la wan hadien ba u Aadnan bad u Inzamamul ki la lah ban kamai mar 27 bad 21 ron, kaba la biang pura ia ki ban seng ia ka nongrim kaba skhem ia la ka kynhun ban jop syndon ia kane ka jingiakhun.
Ka jingiakhun kaban wan ia ka Meghalaya kan long pyrshah ia ka Manipur ha ka sngi Saitjain.
Katba ka lympung iakhun jong ka Senior Women’s T20 Trophy hapdeng ki thei ialehkai ka Meghalaya pyrshah ia ka Manipur bad kumjuh ia ka Sikkim ha kine ki ar sngi kiba la leit noh la hap ban pynsangeh noh namar ka jingbym ailad ka suinbneng, bad ka jingiakhun kaban wan ia ki thei ialehkai ka jylla kan long la sngi Saitjain pyrshah ia ka Arunachal Pradesh, bad ia kane ka jingiakhun la pynlong ha Tripura.
