Shillong, Nohprah 22: Ka Manipur kala pynliem iaka Meghalaya da 73 run bad khlem da donkam ban tied haka sien ka baar ha ka jingiakhun ia ka U-16 Boys’ Vijay Merchant Trophy kaba la long hynne ka sngi Thohdieng ha Cuttack.
Ka Manipur ka la long kaba khlain tam ha katei ka Kynhun ne Group ha kaba kala jop baroh 4 sien na ki 5 tylli ki jingiakhun katba kawei pat kala iakhaid noh.
Hynnin ka sngi ka Manipur kala tied 233 run bad hap 9 Wiket bad kala tam 154 run ia ka Meghalaya kaba la kamai tang 79 ha ka jingleit tiedkaba nyngkong bad haba ka Meghalaya kala leit ban tied ha ka sien ka baar hynne ka sngi kala kamai tang 81 run bad kane kala pynlong ia ka Manipur ban jop da kaba suk.
Kumba long mynta, ka Meghalaya ka don ha ka kyrdan ka baar ha katei ka kynhun hynrei ka jingiakhun hapdeng ka Nagaland pyrshah iaka Mizoram kam pat dep satia bad kumta ka jinglong baar ka Meghalaya kam pat long kaba skhem.
Ka Meghalaya kala ialehi bha ha kane ka lympung iakob ha kaba kala mad iaka jingrem ha ka Sikkim, kala iakhaid bad ka Nagaland bad kala pynrem pat iaka Arunachal Pradesh bad Mizoram.
Ki nongkawang bol ka Meghalaya kiba kynthup ia u Apandanka Marak bad u Gaurav Jyoti Thakuria kila wan haka Top Ten na ki nongioh khur bun ki Wiket.
U Apandanka ula wan balai ha ka ri baroh kawei da kaba ioh ban khur haduh 34 wicket katba u Gaurav ula wan ha ka kyrdan kaba 9 da kaba shim 28 wiket.
