Shillong, Nohprah 08: U Apandanka N Marak ula pynjem khnap ia ka jylla Nagaland da kaba shim 8 wiket bad ai tang 33 run ha ka jingiakhun ha ka U-16 boys’ Vijay Merchant Trophy kaba la long ha Cuttack, hynrei katei ka jingiakhun kaba 3 sngi kala shah pynthud noh ha ka suinbneng bad kala kut noh ha ka jingïakhaid.
Ka Meghalaya kala leit ban tied nyngkong ha ka sngi Balang bad kamai 264 run, ha kaba u Gaurav Narleng ula kamai 68 run bad u Dipayan Nandi 63 run.
Katba ka Nagaland kala kamai tang 151 run bad hap lut ki nongtied kaba la pynlong iaka Meghalaya ban tam lypa da 113 run bad haba kaMeghalaya kala leit ban tied ha ka sien ka baar kala pynkut noh iaka jingtied ka jongka da kaba kamai 88 run bad hap 9 wiket bad kala buh iaka Nagaland ban kamai 202 run ban ioh ia ka jingjop hynrei hashwa ban kut ka Nagaland kala kamai 158 run bad hap 7 wiket.
U Apandanka bad u Gaurav Jyoti Thakuria kila bol bha na ka bynta ka Meghalaya.
Haba leit ban tied biang ha ka sien ka baar, u Kristwal S Marak ula kamai 32 run bad u Rudra Singh Rathore ula kamai 24 run bad ka Meghalaya kala buh iaka thong ba ka Nagaland ka hap ban kamai 202 run ban jop ia ka jingiakhun kaba sah sa tang katto katne kynta jong ka jingialehkai.
U Aloto Sumi uba la lehkai bha marwei ula jan ialam iaka Nagaland sha ka jingjop ha kaba ula tied 106 run bad ym shim la out, katba kiwei pat ki nongtied kim shym la lah ban kyrda slem.
Ha kane ka kynti u nongkawang bol ka Meghalaya u Thakuria ula shim 4 wiket hynrei ha kaba kut hi jong ka jingiakhun, ka Nagaland kala donkam ban kamai sa 44 run katba ka Meghalaya kala donkam ban pynhap sa 3 wiket.
Ka Meghalaya kan iakhun pyrshah ia ka Arunachal Pradesh ha ka Lah Sngi u Blei jongka taiew ban wan.
