Shillong, Nohprah 12: U Apandanka Marak ula bteng ban ialehkai bha ha ka U-16 Boys’ Vijay Merchant Trophy ha kaba ula ioh ia ka hat-trick da kaba pynhap ia ki nongtied kiba tbit jongka Arunachal Pradesh ha ka jingialehkai kaba la long hynne ka sngi Baar.
Ka Arunachal kala leit tied nyngkong bad kala kamai 116 run bad hap lut ki wiket ha kaba u Gaurav Jyoti Thakuria ula shim 6 wiket na ka bynta ka Meghalaya bad haba ka Meghalaya kala leit ban tied kala kamai 304 run bad hap lut ki wiket ha kaba u Rudra Singh Rathore ula kamai 107 run.
U Paisal ula kamai 34 run, u Mewankitbok 25 run bad kane kala iarap ia ka Meghalaya ban poi sha ka 300 run bad ban tam ia ka Arunachal da 188 run.
Ka Arunachal kaba la leit ban tied ha ka sien ka baar hynne ka sngi kala kamai 31 run bad hap 5 wiket bad u nongkawang bol ka Meghalaya u Apandanka ula ioh khur 4 wiket.
U Apandanka ula ioh ia ka hat trick ha kaba baroh 3 ngut ki nongtied ka Arunachal kila shah pynhap ki kynthup ia u Nabam Gania uba nyngkongeh, baar u Tana Hurka ha ka bol kaba khatduh jong ka Over bad haba u Apandanka ula leit ban bol biang ia ka bol kaba nyngkong ha kawei pat ka over, ula ioh ban shim iaka wiket jongu Nabam Jenam bad mar kumta hi ki nongialehkai ka Meghalaya kila ia mareh lut sha u Apandanka ban ialehkmen halor ka jingioh ia ka hat trick.
Hynnin ka sngi u Apandanka ula shim 3 wiket, hynrei u Thakuria, ula ioh khur 6 wiket bad ai tang 23 run.
