Shillong, Nohprah 12: Ka Organising Committee jong ka KSU Mawlai circle hynne ka sngi Baar, kala pynlong ka jingkhynra ia ki mynder ba wan bylla ha ka shnong Mawlai bad ha kane ka jingkhynra ka KSU kala phah leit phai noh ia ki bar jylla kiba wan trei khlem da don ia ki kot ki sla kiba biang.
Katkum ka kyrwoh na u samla Macdonald Jitem, Assistant General Secretary KSU Mawlai Circle ula pyntip ba ha katei ka jingkhynra ha ka thaiñ Mawiong, Nongkwar bad ïewrynghep kala lap ia bun ngut ki mynder kiba wan ban trei ia ki kam ñiat rong, tah tiles bad kiwei ki kam trei misteri ha kaba kim shim la pynbiang ne don kino kino ki kot ki sla khamtam ka Work Permit.
Ka seng kala phah mih noh ia ki mynder ki bym don ki kot ki sla bad ba kidei ban leit phai noh sha ka jaka kaba ki wan bad kala maham tyngeh ba kim bit ban dang wan trei wan ktah hapoh ka shnong Mawlai bad ha Ri Khasi hi baroh kawei.
Ka KSU Mawlai Circle ka kyntu ia baroh ki trai ïing, kontraktor bad sha baroh ki para ri ba kidei ban kiar na ka jingaikam aijam ia ki mynder namar kane kan nang pynkharoi shuh shuh ia ki mynder ri bad kan buh jingma ia ka ri bad ka Jaidbynriew hi baroh kawei, namar lada ki mynder ki wan hynrei lada kim ioh ia ki kam ki jam ban kamai jakpoh kin nym lah ban shong ban sah hangne.
“Ka seng ka iawer ia baroh ki para ri ban sangeh noh ban aikam ia ki briew kiba nabar bad ban sdang ai kam para Khasi kum shi bynta ba ngin ialeh pyrshah bad iada ia ka jingsdang ban wan buhai shnong ki mynder ri hapoh ka ri baieid jong ngi” la pynkut ka kyrwoh.
