Shillong, K’lyngot 25 : U Myntri Rangbah ka Jylla Conrad K Sangma hynne ka sngi Saitjain, ula plie ia ka Mawhati C&RD Block ha ka jingalang kaba long ha ka shnong Umsohlait, kaba dei ruh ka jingphohsniew bad jingdaw bala slem bha jong ki paidbah ka thain.
Ha kane ka jingialang la iadonlang ruh u Myntri ka Tnad C&RD Abu Taher Monol, MLA ka Mawhati Bah Charles Marngar bad MLA ka Umsning Dr Celestine Lyngdoh.
Haba ai jingkren, u Conrad ula ong ba ka jingplie ia kane ka Block ka dei ka sakhi ia ka jingkut jingmut jong ka Sorkar ban wanrah shajan ia ka synshar khadar shajan jong u paidbah..
“Ki don ia kumba 1 lak ngut ki briew bad nongshongshnong hapoh ka Umsning C^RD Block bad ki briew ki hap ban iaid haduh 100 kilometer ban poi sha ka Ophis ka Block. Kumta ka Sorkar ka sngew ba kane ka dei ban kylla bad kumta kala shim ia kane ka sienjam ban pynthikna ia ka jingshakri kan poi shajan u paidbah”.
Ula ong ba kane ka Block kan ym iarap tang ia ki paidbah ka Mawhati hynrei kan pynmyntoi ruh ia ka Umsning namar kiba un ki shnong jon gka Umsning ki hap hapoh ka Mawhati Block.
Ula pyntip ruh ba ia ka mang tyngka jong kane ka Ophis ka Block ha Mawhati yn sa aiti noh kham kloi kat kaba lah khang ba ka Mawhati Block kan treikam noh kham kloi.
Ula pyntip ruh ha kane ka jingialang halor ki project kam pynroi bapher bapher ha ka thain bad kawei napdeng jong ki, ka dei ka surok Umsning-Mawhati ka ban dei ka surok ba kongsan bha ban kyntiew ia ka ioh ka kot bad ka jingshakri jong ka Sorkar.
Ula kyntu ia ki paidbah ba kin iatreilang bad ka Sorkar Jylla ha ki kam pynroi bad kyntu ia ki Ophisar ki ban sa ai jingshakri ha Mawhati C&RD Block ba kin ai ka jingshakri ia ki paidbah da ka jingsngewrit bad jingsngewlem.
Kiwei kiba la kren ha ka jingialang ki kynthup ia u Myntri ka Tnad C&RD Abu Taher Mondal, u MLA ka thain bad kiwei kiwei.
Ha kane ka sngi, u Myntri Rangbah lem bad kiwei ki heh ki sain kila san ia ki M-Tab sha ki samla pule klas XI.
