Nongpoh, Lber 05: Ka RBYF Bhoirymbong Circle, kala leit ujor pyrshah ia ka interview thep kam jong ka tnad Ayush hapoh Ayush Hospital, Bhoirymbong, namar ka jingshem ba jah rngai haduh 8 tylli ki post na ka jingpynbna laitkam.
Kane ka seng hapoh ka jingialam u President samla Spirit Hinge,kala buh ia ka jingujor hakhmat ka District Medical & Health Officer (DMHO), ban pyrshah ia kane ka interview thep kam, kaba la buh ban long ha ka 7,8 bad 11 tarik Lber.
Kat kum ka jingiathuh une u Nongialam ka seng, ka Ophis u Director ka Ayush kala pynbna ba ki don haduh 21 tylli ki post ne ki kam ki ba lait hapoh ka Ayush Hospital kaba 10 jingthiah ha Bhoirymbong. Hynrei ha ka jingpynbna khot thep kam pat, la pynmih ba lait tang 13 tylli ki kam.
“Ka pynlyngngoh ia ngi ba 8 tylli ki post ki jah…shaei kine ki post ki jah bad balei ba ym shem la pynbna lang ia ka tarik khot interview ia kine ki post” ula buh jingkylli.
Ka RBYF-Bhoirymbong kala dawa ia ka DMHO ba kan tuklar ia kane ka kam bad ban bthah ia ka Ophis u Director ka Ayush ba un pynbna lang noh ia ka interview thep kam na ka bynta ki 21 tylli ki kam kiba lait khnang ba ki samla kin ioh ia ka hok ban iakhun ban iohkam ha ka lynti kaba khuid bad bym shah liang.
“Ka jingwan iakynduh jongi ngi ia ka DMHO ka long ban pan jingshai halor kane ka jingkhot interview bad ka jingpynjah ia 8 tylli ki kam na ka jingpynbna khot thep kam” ula ong.
U samla Spirit Hinge ula pyntip ba ha ka jingiakren bad ka DMHO, la pynshai ba ka jingkhot interview kan long tang ia ki 13 tylli ki post katba ia ki 8 tylli kiwei pat, yn sa shu jied ia kito kiba wan ha ka waiting list.
“Da lei lei ngim pdiang ia kane bad ngi dawa ba ka Tnad ka dei ban khot interview lang shisyn khot ia baroh ki kam kiba lait” ula ong.
