Ujor mukotduma ka HYC sha ka Lokayukta ba thied tin sop iing ba taddor ka Tnad Housing

Shillong, Jylliew 25: Ka Hynniewtrep Youth Council (HYC) kala ujor mukotduma pyrshah ia ka Directorate ka Tnad Housing hapoh ka Meghalaya Lokayukta, ba kan tohkit halor ka suba jyrsieh na ka kam thied tin sop iing bala sam sha ki paidbah lyngba ki Block.

Kane ka jingujor kala wan jia hadien shisngi ba u Myntri ka Tnad Housing ula pynbna bala thung ia ka jingtohkit Departmental Inquiry halor ka jingkynnoh ba sam tin sop iing taddor.

U Myntri ula kam ruh ba ka jingthied tin sopiing da ka Tnad ka dei kaba la iaid kat kum ki kyndon bala buh da ka Sorkar Jylla.

Haba iakren bad ki lad pathai khubor hadien ka dep ujor ia ka mukotduma, u President ka HYC Bah Roykupar Synrem ula pyntip ba ia kane ka jingujor la leh kat kum ka kyndon 20 jong ka Meghalaya Lokayukta Act, 2014.

Une u Nongialam ka HYC ula pyntip ba ka jingujor ka long pyrshah ia ka Directorate ka Tnad Housing halor ka jingkynnoh bamsap na ka jingthied ia ki tin na ka kompani ka Jylla West Bengal, ha ka jinglut kaba ym duna ia ka T.20 klur.

Ula kynnoh ruh ba ka jingpynbna u Myntri bala thung ia ka jingtohkit ka ban khlieh da u Joint Secretary, ka dei tang ka jingpyndep rukom.

“Namar ba ka seng kam hun iaka jubab u Myntri ka tnat Housing, nga kum u nongujor nga la wan ujor pyrshah iaka Directorate ka tnat Housing haka Meghalaya Lokayukta namar baroh ki tip baka Lokayukta ka don iaka bor ban tohkit iaki jingkynnoh bamsap pyrshah iaki nongtrei ne ki ophisar Sorkar” ong u Bah Roykupar.

U Bah Roykupar ula ong baka Meghalaya Lokayukta nalor baka don iaka bor, ka don ruh daka kynhun tohkit ia kino kino ki jingkynnoh bamsap, khamtam kiba iadei bad ka jingpyrsywa kai ia ka pisa paidbah.

Nalor kane ka HYC kala dawa ia ka Sorkar ba kan phah pynphai biang iaki tin bala dep pynpoi sha Jirang, Shella bad Nongstoin C&RD Block namar kidei kiba stang palat bad kim long ban sop ia ki iing.

“Haka jingujor, ngi la dawa ba dei ban pynshitom iaki ba don bynta ban pynsyrwa kai ia ka pisa u paidbah namar katkum ka Tender jong ka jingthied iaki tin sop iing, ka poi ym duna iaka T.20 klur bad ki tin kidei ban don ka jingrben 0.45 hynrei ka seng kala ioh ka jingujor ba ki tin ki long tang 0.25 ka jingrben” ula ong.