Nongstoin, Nailar 28 : Ki kynhun bapher bapher ka West Khasi Hills ba kynthup ia u Sordar ka Mawsikar bad ki Sengbhalang, ha ka sngi Palei, kila leit ujor hakhmat u Deputy Commissioner ka District halor ka jingiai bteng ban wan kyntur pud da ka Assam ha ka thain Langpih.
Kane ka jingleit ujor kala wan jia hadien ka jingkulmar kaba mih hynnin ka sngi Balang ha Langpih, na ka jingwan thew jaka jong ki briew na Assam ban pyntrei pynheh ia ka surok na Kamphaduli haduh Mawsikar.
Ki paidbah ka thain kila iamih ban pynsangeh ia kane ka jingthew jaka bad beh krad syndon ia ki briew ba na Assam, kaba la pynmih ia ka jingiania kaba jur bad poi ruh sha ka jingiasyndong kti. Hynrei da ka jingdon ryngkat ki Pulit ka Langpih Border Outpost, kine ki nong Assam kila hap ban pyndem bad phet na kane ka thain.
U Sordar ka Mawsikar bala synran da ki nongialam ka FKJGP West Khasi Hills, KSU Rimuliang bad ka Hynñiewtrep Youth Council Rimuliang circle, kila leit ban iakynduh markhmat ia u Deputy Commissioner Bah Garod LSN Dykes, bad dawa ba un tuklar ia ka jingiai kyntur pud ka Sorkar Assam.
Kila kynnoh ba kane ka jingwan thew jaka ban pyntrei surok ka dei ka jingpynkhein ia ka soskular status quo bad ka jing bym burom ruh ia ka jingiakren pynbeit pud hapdeng ki Sorkar ki ar Jylla kaba dang iaid mynta.
U Sordar Bah Trasdinglang Nonglang ula iathuh ba ka Dorbar Shnong Mawsikar, naduh ki snem bala dep, kaa rai ba kan ym shah shuh ia ka Sorkar Assam ba kan wan pyntrei ia ki kam pynroi ha ka thain katba ym pat lah ban pynbeit ia u pud u sam hapdeng ka Meghalaya bad Assam.
Ula ong ba ka Dorbar Shnong kam shym la shah shuh ia ka Assam ba kan dang mushlia ia ki jaka puta ha ka thain Langpih haba dawa ruh ia ka Sorkar Meghalaya ba kam dei shuh ban shu shah jem ia ka jingpynkhein kular jong ka Sorkar Assam. U ong ba lada ka Sorkar Meghalaya ka dang bteng ban shu shah jem,ki paidbah ka thain kin ym ailad shuh kam pher wat lada poi haduh u pud an ia kurup para briew.
U bah Serbilin Lyngdoh President ka FRKJGP Rimuliang circle, u la ong ba baroh ki paitbah nongshong shnong ka thaiñ Langpih, kim kwah satia ba ka sorkar Assam kan wan pynbiej da ki kam pynroi, namar ki sngewthuh shai ba ki dei ki nongshong shnong jong ka Meghalaya bad ki kwah ban sah beit hapoh ka West Khasi Hills.
Ka Seng ka iai dawa ia ka Sorkar Jylla ba ka dei ban pyndep noh ia ka jingiapynbeit ia u pud u sam ka thain Langpih khnang ba kan nym mih shuh kano kano ka huri hura ha ka thain.
