Nongstoin, Nohprah 21: Ki saw seng ba kynthup ia ka WKSU, UHM, MYF bad WYF, ha ka sngi hat majai ki la leit ujor hakhmat u Chief Engineer ka tnad PWD pyrshah ia ka jingkynnoh siang rong tang dep rukom ha ka surok shnong Mawduh ter ter sha Dewlynnong Nongkhnum.
“U CE PWD ba dei peit ia ka PMGSY, ula kular ban sa phah jurip ia ka surok ba kynnoh siangrong torti na Mawduh sha Nongkhnum” pyntip u Bah D.Sun President ka WKSU haba iakren bad u nongthoh khubor halor ka jingleit iakynduh ia u Chief Engineer.
U la iathuh ruh ba u Chief Engineer u la kren shai ba ka jingpyntrei ia ki surok PMGSY, ka dei ban long kaba pyrkhing bha bad dei ban pyntrei ruh ia ka kat kum ki kyndon bala buh. U la ong un sa shimkhia ia ka jing dawa jong ki saw seng na ka bynta ka jingbit jingbiang ki paidbah jong katei ka dong bad ka thain”.
“Ha kaba iadei bad ka jingthmu ai wai sha ki riew shimet ia ka IB PWD barim jong ka Nongstoin EE PWD Division, u CE PWD u la kren shai ba kam don ei ei kaba kum kata ka jingthmu na ka liang ka ophis jong u.
