Shillong, Iaiong 09 : Ka Liang Pyrshah Voice of the People Party (VPP) ha ka sngi Ba-ar, kala ujor pyrshah ia u Nongialam ka NPP bad Chief Executive Member (CEM) ka KHADC bah Pyniaid Sing Syiem namar ka jingkynnoh pyrshah ia ka party ba ka donkti ban pynthut ia ka jingialang ka NPP hynnin ka sngi.
Ha ka kyrwoh, u President ka VPP Bah Batskhem Myrboh ula ong “…ka jingkynnoh bala pynmih da u Bah Pyniaid Sing Syiem, u Nongialamka VPP, ba ka VPP kala pynthut ia ka jingialang jong ka NPP ka dei ka bym don nongrim satia”.
“ka VPP ka daw aba u dei ban sei ia ki sakhi satar ban pynshisha ba kito kiba hylla slogan “Ha U Prah” ki dei ki dkhot jong ka Party lane kiba phah da ma ngi lane wat ki nongiarap jong ngi” ula ong.
U Bah Myrboh ula ong ba ka long kaba sngewsih ba tang namar ka jinghylla slogan jong uwei u ar, kan lam sha ka jingktah kti bad shoh bad dawa ba ki nongktah kti ki dei ban shah pynngat kat kum ki kyndon jong ka ain.
“Ka jingleh jong ki Nongialam ka NPP ka pyni pynban ia ka jingsngew kutlad bad ka jingbym long rangbah ban tem ia kum ine I kam barit. Kaei kaba kham ma shuh shuh ka long ka jingbthah ia ki Heh Pulit ba kin kem, khlem da iaid kat kum ki kyndon ain, ia ki riew paidbah tang namar ka jinghylla slogan. Kane ka pyni ba kumno ki nongialam ka NPP ki pyndonkam bakla ia ka bor bad kam sngew pylla ba ki briew kila pyni ia ka jingbitar sha ki” ula ong.
“Hynrei, ngi kyrpad ia ki nongiarap jong ka party ba lada jia ba ki leh ia kum kane ka kam bad ban kiar na ka jinghylla slogan ia kino kino ki nongialam ba kim itynnad, ka kput kaba biang eh ka dei ka kput ha ka ballot” ula bynrap.
Ha kajuh ka por, une u Nongialam ka VPP ula kyntu ban husiar ia ki nongiarap ka party na kano kano ka jingpyrshang jong ki sengsain pyrthei ba don ha ka MDA, ban pynjah kyrteng ia ka party (VPP) tang ban ioh ia ka vote sngew synei.
Ha ka shithi ujor sha u Chief Electoral Officer (CEO), u Election Agent ka VPP Danny Langstieh ula ong “Nga kwah bap him khmih lang ia ki jingkynnoh ba khlem nongrim jong u Bah Pyniaid Sing Syiem, u nongialam jong ka NPP, b aka VPP kala pynmih ia ka jingkulmar ha ki jingialang ka NPP. Kine ki jingkynnoh ki dei kiba ula pynmih ha ka 6 bad 8 tarik Iaiong 2024 haba ialap elekshon ia ka party jong u ha Rynjah, East Khasi Hills, bad Umsning, Ri-Bhoi. Ngi kyrpad ia ka Ophis jong phi ban leh eiei kat kum ka rule”.
