Shillong, Jylliew 12 : U MLA ka Voice of the People Party (VPP) na North Shillong Bah Adelbert Nongrum ha ka sngi Balang, ula buh ia ka jingujor hakhmat ka Meghalaya Lokayukta pyrshah ia 10 ngut ki Heh Sorkar bad ka Meghalaya Energy Corporation Limited (MeECL) halor ka jingkynnoh bamsap na ka jingpyntreikam ia ka Saubhagya Scheme.
Kane ka ujor ka long pyrshah ia u Chief Secretary barim, u Additional Chief Secretary barim (Power), Chairman cum Managing Director (CMD) ka MeECL bad ki Heh Ophisar ka MePDCL ba kynthhup ia u Director (Distribution), Chief Engineer (Distribution), Chief Engineer (Rural Electrification), Company Secretary, Chief Accounts Officer/Deputy Chief Accounts Officer, Additional Chief Engineer (Material Management) bad Additional Chief Engineer (Planning & Design).
La pynshong nongrim ia kane ka ujor kat kum ka kaiphod jong ka Comptroller and Auditor General of India on Social and Economic Sectors jong u snem ba kut 31 tarik Lber, 2022.
Ha ka ujor, u bah Adelbert ula ong “Ia kane ka ujor la mudui hapoh ka kyndon 13(1)(a) jong ka Prevention of Corruption Act, 1988 halor ka nongrim ba ki nongtrei Sorkar bala kdew haneng, kiba don ha ka kam ha katei ka por jong u snem 2018, kila bam klop ia ka pisa bala buh ha ka jingpyniaid jong ki kum ki shakri Sorkar lane ailad ia kiwei pat ba kin leh”.
Ula ong ba ka Chapter 3 jong ka kaiphod CAG ba iadei bad ka jinglap ka Audit halor ka jingtreikam ki State Public Sector Enterprises, bad ka para 3.3 jong ka kaiphod ka pyni ia ka jingshem ia ka jingpynlut haduh T.156 klur ba lah ban kiar hapoh ka MePDCL, ka jingshem kaba sngewkhia ia ka jingpynlut pynsep ia ka pisa u paidbah.
“Wat hapdeng ka jingbthah bala pynmih da u Cabinet Secretary, ka rai bym shonghok jong ka MePDCL ban ai kam hapoh ka SAUBHAGYA sha ki Contractor ha ka dor ba ki buh, kala lam sha ka jingpynlut ba lah ban kiar, kaba kot haduh T. 156.14 klur” ong u Bah Adelbert.
Ula ong ba ka jingshem ka Audit ka pynpaw ba ka jingweng noh ia ki katto katne ki kyndon na ka bid document jong ki kam hapoh ka SAUBHAGYA Household Electrification Programme da ka Empowed Committee (Tender) jong ka MePDCL kam long satia tang ka jingleh bym hok bad iaid pyrshah ia ka jingbthah bala ai da ka Rural Electrification Corporation on Standard Bid Document bala pynmih da ka Sorkar India hynrei ka pyniohnong khlem nongrim ia ki contractor.
“Ka jingshem Audit ka pynpaw ba ka Wmpowered Committee (Tender) ki kynthup ia ki heh Ophis ka MePDCL
: i) Director (Distribution) as Chairman, ii) Chief Engineer (Distribution), iii) Chief Engineer (RE), iv) Company Secretary, v) Chief Accounts Officer/Deputy Chief Accounts Officer, vi) Additional Chief Engineer (Material Management) vii) Addl. Chief Engineer (Planning & Design), ia kaba thaw ha u 2017 da MePDCL; bad kumta ia kine ki Heh ka MePDCL la jer kyrteng kat kum ka kyrdan ba ki bat ha kane ka mudui hakhmat ka Meghalaya Lokayukta” ong une u MLA.
