Shillong, Nohprah 26: Ka Nongialam jong ka Thma U Rangli-Juki (TUR) ka Kong Angela Rangad ha ka sngi Palei, kala ujor da ka ejahar pyrshah ia u nongleh Social Media uba la leit rung hapoh ka iingmane jongka Epiphany bad pyrta slogan “Jai Shree Ram” da ka jingthmu ban pynmih iaka jingiapher niam ha katei ka iingmane.
Kane ka Iingmane ka dei kaba don ha Mawlynnong, East Khasi Hills, kaba dei ruh ka jaka kaba la tip kum ka shnong kaba khuid tam ha dewbah Asia.
Ha ka ejahar kaba la ujor ha Laitumkhrah police station, ka Kong Rangad kala ong, “Dang shen nga lah iohi ia kawei ka video haka rynsan social media Facebook bad Instagram jong u Akash Sagar, ha kaba ula leit rung hapoh ka iingmane jong ka Epiphany, Mawlynnong bad ula pynkhein ia ka jinglong kyntang jongka iingmane da kaba leh khnang bad kaba la buh jingmut lypa ban iaid ha ki bynta jongka pulpit bad pyrta ia kiei kiei kiba long pyrshah khristan bad rwai pynjah burom ruh ia ka jingrwai bym dei jong ki khristan”.
“Kane ka jingleh kadei kaba la leh khnang ha ryngkat bad arngut kiwei pat kiba la paw ha ka video, ban pynmih ia ka jingsngew iapher niam, ban iuhroit ia ka kolshor jong ki ritpaid bad ban thaw iaka kolshor jong ki heh paid kaba dei da ka jingshun, da kaba pynkhein ia ka riti synshar ka ri halor ka jinglaitluid ban mane Blei”, ong ka Kong Angela.
Kala kynnoh ruh ba katei ka video kala pynmih iaka jingsyier bad kaba lah ruh ban pynmih iaka huri hura bad khamtam eh ia kitei ki video la pynsaphriang ha kylleng lyngba ka social media ban kyntiew ia ka niam heh paid bad ia ka jingiashun.
“Kumta, nga kyrpad bad dei ban leh da kaba tyngeh mardor pyrshah ia une u briew uba la donkti ha kane ka kam sniew bad uba don ia ka jingthmu kaba sniew bad kyntu ruh ia ki rynsan ha ki social media ba ki dei ban khang pyrshah ia kitei ki video, ki nongthaw bad ia ki briew kiba don ha ka tei ka group kiba pynsaphrinag ia katei. Une u briew u donkam ban shah pynngat bad dei ban shimkhia katkum ka ain bad ban pynthikna ba kum kitei ki jingleh kiba sniew buh haka jingma ia ka jingsuk ba kim dei ban jia shuh” la ong ka Tur ha ka kyrwoh khubor.
 ka Kong Angela Rangad ha ka sngi Palei, kala ujor da ka ejahar pyrshah ia u nongleh Social Media uba la leit rung hapoh ka iingmane jongka Epiphany bad pyrta slogan “Jai Shree Ram” da ka jingthmu ban pynmih iaka jingiapher niam ha katei ka iingmane.){kind=link}