Shillong, Dec 26: Ka jylla Meghalaya kan iakhun pyrshah ia ka Services ha ka Quarter Final kaban long ha ka sngi Thohdieng, hadien ba kala wan baar haka Group B jongka Senior Men’s National Football Championship jongka Santosh Trophy 2024-25.
Ka Meghalaya kan iakhun pyrshah ia ka Services kaba bat ia ka nam lahduh, ha ka jingiakhun kaban long ha Deccan Arena, Hyderabad naduh ka por 7:30 mynmiet.
Ka Services kala jop la 7 sien ia kane ka lympung iakob ialehkai Football, hynrei mynta ka kyntyi kala wan balai haka Group A, hadien jong ka West Bengal bad Manipur.
Katba ka Kerala kala wan banyngkong ha ka Group B bad la bud sa ka Meghalaya, katba ka Delhi bad Odisha kila wan balai bad ba saw.
Ka Meghalaya na ki 4 sien ki jingiakhun kala ioh khur 8 point bad kane ka kynhun hapoh ka jingialam u Coach u Bah Hering Shangpliang kan pyrshang ban ialehkai bha haka nsgi Thohdieng ban ioh khur ia ka jingjop.
Ka Services, kala jop 3 sien bad kala shah pynrem noh ha ka Manipur bad West Bengal.
Ka Services kala ju iakhun teng pyrshah ia ka Meghalaya ha ka Santosh Trophy ha kaba kala jop ha u snem 2022-23 bad 2023-24 bad kitei ki ar tyllli ki jingiakhun kiadei ha ka Group Stage. Hynrei mynta kila tip shai ba kan ym don shuh kano kano jingioh lad sa shisen, namar kat kiba rem lashai ka sngi Thohdieng ha kaba kiba rem kin ym ioh rung shuh sa kawei pat ka bynta ha ka jingiakhun ia ka Santosh Trophy.
