Shillong Nailur 22: Ka Khasi Students’ Union – West Jaintia Hills District hynne ka sngi palei kala leit ujor ha u Deputy Commissioner ka West Jaintia Hills District ban dawa ban tuklar lem halor ka jingpyndik jong ki shipai Border Security Force (BSF) ia ki paid Khasi kiba sah ha ki thain khappud bad ka Ri Bangladesh.
Ka KSU-WJHD hapoh ka jingialam u President u samla Chanbor War bad General Secretary Leningrad Tariang, kala pynsngew hakhmat u DC iaka jingeh ba mad da ki paidbah Khasi kiba sah naduh Dawki shaduh Muktapur namar ka jingpyndik jong ki shipai BSF ba shaba palat liam wat haba ki leit iew leit hat.
U Samla Leningrad u la ong, ki BSF ki pyndik ia ki paidbah haba ki leit sha ka ïew Amlarem, Dawki da kaba bat iaki kali bad ki khynra iaki mar ki mata kiba ki thied na ïew nalor ba ki lah pynbiang iaki ‘Cash Memo’ kaba kila ioh na ki dukan ba ki thied ia ki mar ki mata.
U la ong, ki BSF kim khein snep ruh wat ia ki briew kiba pang ba shitom kiba thmu ban leit shim dawai na ki jaka ai jingsumar hynrei ki bat iaki da ki kynta bad katei ka jingleh jong ki shipai kala pynbitar iaki paidbah jong ka thain khamtam haba ki BSF kim ju pyndik pat ia ki nong Bangladesh haba ki rung bad mih laitluid napoh ri India haka thain khappud.
Ka KSU ka pynrem jur ia kane ka jingleh jong ki shipai BSF ki bym burom ia ki trai ri trai muluk ne iaki kynthei khynnah kiba shong ba sah ha katei ka thain.
U Samla Leningrad u la pyntip ba u DC ula kular ha khmat ki nongialam ka seng ba yn tuklar mardor ia kane ka kam bad yn ym ailad da lei-lei ba kiBSF kin pyndik ia ki trai ritrai muluk.
Ha kawei pat ka bynta, ka KSU kala dawa ruh na u DC ban weng noh mardor iaka ktem jong ki shipai BSF kaba la buh ha Amlarem hynrei ban phah pat rah iaka ktem sha ki jaka khappud ban khanglad ia ki briew kiba na ri Bangladesh ban rung shapoh ri India.
