Shillong Nailur 27: Ka Khasi Students’ Union (KSU)- South West Khasi Hills District hynne ka sngi ba-ar, kala ujor sha ka Deputy Commissioner ka South West Khasi Hills District ban tuklar lem halor ka jingshah pyndik ki nonghikai Khasi kiba hikai ha ki thaiñ khappud jongka District.
Ka KSU kala buh ia kane ka jingujor lyngba ka dorkhas ba la soi da u President Samla Forwardman Nongrem.
Kat kum ka dorkhas, une u Nongialam ka KSU ula pyntip ba ha kine ki khyndiat sngi, kila don ki nonghikai kiba la wan phet shala iing na kadaw ka jingtieng.
“Kala don ka kynja jingpynbna (Notice) bala pynmih da ka Garo Students Union (KSU) bad AKHAF kaba pyrshang ban pyntieng, pynsmiej bad iuhroit ia ka hok ki Nonghikai Khasi ha ki thain Khappud” ula ong.
U samla Forwardman u pyntip ba ka Seng kala ioh ruh ba iakynduh ia kine ki nonghikai kiba la pynpaw ba kim don shuh ia ka jingsngew shngain haba ki leit ban pyndep iala ka kamram sha ki skul na ka daw jong ki jingjia kiba kum kine.
“Ka Seng kam kwah ban mih ki jingiapher jaidbynriew hapdeng ki Khasi bad ki Garo kiba sah ha South West Khasi Hills District, kumta, ngi shim ia kane ka sienjam ban ujor bad pynsngew sha phi (DC), ban peit bha halor kane ka bynta khnang ban tehlakam iaki jingjia ba sngewsih hadien habud” ong ka KSU ha ka dorkhas.
“Yn ym don hi kiba lah ban shu peit lada ki para ri bad paradoh parasnam ki shah pynthud bad shah pyndik na ka por sha ka por. Ngi kyntu ia phi (DC) ba phin sngewbha ban pynthikna ba ki nonghikai Khasi kiba hikai ha kitei ki thaiñ kin ym don ha ka jingshongsyier bad ban pynshitom ruh ia kita ki briew kiba ju wanrah iaka jingiapher jaidbynriew da kaba pynbna bad pynshit Jaitbynriew, kaban ktah ruh iaka shongsuk shong shngain hadien habud” pynpaw u nongialam ka KSU-SWKHD.
Ka KSU kala pynpaw ruh iaka jingkyrmen kaba skhem ba ka DC kan shimkhia ia kane ka mat na ka bynta ban wanrah iaka shongsuk shongshngaiñ jong ki nonghikai skul bad ia ki paidbah kiba sah ha thaiñ khappud.
