Shillong, Jymmang 02: Ka Khasi Students Union, East Jaintia Hills District Unit ha ka sngi Balang kala ujor ha u Deputy Commissioner ka East Jaintia Hills pyrshah ia ki karkhana pynmih dewbilat halor ka jingbym pynmih ia ki khubor thep kam (Advertisement) ha ki lad pathai khubor ha jylla.
Ka KSU kala pynpaw, ba kala lap ba bun ki kam kiba lait ha kine ki kharkhana la pyllait ia ki ha ki kot khubor ha kiwei pat ka jylla kum ha Bihar, Assam bad kiwei kiwei ki Jylla bad kane ka jingleh jong kine ki kharkhana kala pynbitar ia ka seng bad ka pyni ba kim burom bad kheiñ snep satia ia ki trai ri ban iohkam iohjam.
“Ka jingleh jong kine ki kharkhana pynmih dewbilat kiba don ha ka thaiñ East Jaintia Hills District hi baroh kawei, ka pyni shai ba ki kwah tang ban kjit ia ka spah mariang ka jong ngi khlem da sngewlem tang khyndiat ruh ia ki samla jong ngi kiba la pyndep ia ki jingpule ha ki kyrdan bapher bapher bad kiba la tbit (Qualified) ban trei ha kata ka kam kaba dei hi ka laiñ pule jong ki” ong ka KSU ha ka kyrwoh khubor.
Ka KSU kala dawa na u DC ban tuklar ia kane ka kam bad ban bthah ia ki karkhana pynmih dewbilat ba kidei ban pynmih ia kano kano ka jinglait kam ha ki lad pathai khubor kiba don ha ka jylla.
Kila pyntip ruh ba ka KSU kan sa pynlong ia ka Job Fair ha ka thaiñ East Jaintia ha kaba kine ki kharkhana kin hap ban thep kam ia ki samla ka thaiñ ryngkat ka jingiatreilang bad ka bor District lada long kaba lah.
Kila pyntip ruh ba u DC ula ong, ba un ai da ka jingthoh sha baroh ki karkhana pynmih dewbilat kiba don hapoh District ban ia kren halor kane ka kam.
