Shillong Risaw 22: Ka Jaintia Students Union, Syndai Unit hynne ka sngi Baar kala leit ujor sha ki bor District bad JHADC halor ka jingkynnoh tei be-aiñ ki bar jylla ia ki jaka Mane blei ha ka shnong Lakroh, West Jaintia Hills.
Ka JSU hapoh ka jingialam u President samla Pynshailang Suliang bad u General Secretary samla Mebanri Suliang kila leit buh ia ka jingujor ha ka Additional DC bad ha u CEM ka JHADC halor kane ka kam.
Ka Seng ka pynpaw ruh ia ka jingbitar namar ba u CEM ka JHADC um shym la treh ban iakynduh ia ki nongialam jong ka seng ban iakren ban ia phylliew halor kane ka kam, kaba ktah ia ka jaidbynriew.
Ka JSU ka ai khublei ia u CEM ka JHADC da kaba kynnoh ba ula pyni im-im peit-peit ba udei u ingkhong shallang mat.
Ka JSU kala pynkynmaw ba ha u bnai Lber, ka seng la leit jngoh ia katei ka jaka ba tei jaka mane blei bad ka la ujor ha u Daloi ka Eleka Satpator hynrei haduh mynta ym shym la iohi ia kano kano ka dak ka shin ban leh eiei.
Ka seng ka kyrpad ia ki bor ba dei peit naduh ka District Council, ki bor district ba kin shimkhia ia kane ka kam khnang ban lait na kino kino ki kynrum kynram.
Kala maham ruh ba lada ka sorkar bad ka District Council kim shimkhia ia kane ka kam, ka seng ka kren da kaba shai kdar ba kan ym shim ia ka jingbahkhlieh lada mih kino kino ki jingjia hapoh ka thaiñ.
