Nongstoiñ, Ïaiong 26: Ka Hynñiewtrep Youths’ Council (HYC) West Khasi Hills District, ki la leit ujor hakhmat u Deputy Commissioner Bah Garod LSN Dykes halor ka jingkdiah ka jingkieng kaba don ha Kynroh, ha lynti ban leit sha Mawkyrwat.
Ka HYC-WKH ryngkat ka Nongstoin Circle bad Lai Lyngdoh Circle,kila leit iakynduh ia u Deputy Commissioner ban aiti ia ka dorkhas halor kane ka kam.
Kila pyntip ba ka jingkdiah jong kane ka jingkieng kala buh ha ka jingeh ia ki paidbah kiba la hap shna lynti ba shipor ne subway nakhrum ka jingkieng kaba buh ha ka jingma mynta bala wan ka lyiur.
Ka HYC kala kyrpad ia u DC ba un tuklar ha kaban bthah ia ka PWD bad ia ka kompani ba pyntrei ia ka surok ba kin pynkloi noh ha ka jingshna ia ka jingkieng ba thymmai.
Kane ka seng kala ujor ruh halor ka jingpynsah ïa ki shipai kiba don kumba 90 ngut ei ei ha skul KJP Hr. Secondary School Tiehsaw, Nongstoiñ.
Ia kine ki shipai la pynsah naduh 8 tarik Ïaiong 2024 kaba la kot mynta lah jan 3 taiew haduh ba ki bor pyniaid skul ki la hap pynsangeh ban long skul.
Ka ong ba kane ka la ktah ïa ki khynnah skul bad ki kmie ki kpa bad kumta la donkam ban pynkynriah noh ïa ki sha ki ïing sorkar lada dang donkam ban pynsah ïa ki, khnang ba kan nym ktah ïa ka lawei ki khynnah pule.
La iathuh ba u DC u la kular ban shimkhia halor katei ka jingkieng bad ong ba ka dei ban long kaba bit bïang ïa ka ïaid ka ieng ki paitbah.
Halor katei ka jingdon ki shipai ha KJP Hr Secondary School Nongstoiñ, u la kular ban weng noh lashai ka sngi.
