Nongpoh, Nohprah 07: Ka Hynniewtrep Integrated Territorial Organization (HITO), Ri Bhoi District, hynne ka sngi Balang kala leit ujor sha ki bor pyniaid District ka Ri-Bhoi pyrshah ia ka kompani Indradhanush Gas Grid kiba la sdang ïa ka project pynpoi gas khlem da pan jingbit na ki bor shnong bad ka Raid ha Mawbri.
Kane ka seng kala aiti da ka jingthoh sha u Deputy Commissioner ka District haba dawa ba dei ban pynsangeh shuwa ban pyntrei ia kane ka project.
Ka kompani Indradhanush Gas Grid Limited ka dei ka kompani kaban pyntrei ïa ka project pynpoi Gas lyngba ki Pipe line ba ïaid lyngba na Ri Bhoi sha kiwei kiwei ki jylla hapoh ka thaiñ Shatei Lam Mihgni ka ri India.
Ha kane ka jingujor, ka HITO ka la pynpaw ba kane ka kompani ka la sdang ban pyntreikam ïa ka project da kaba pynhap ïa ki pipe ha pynthor bad ruh la pynpoi ïa ka JCB ha ka shnong Mawbri khlem da pan jingbit ne kynjoh ktien ia ki bor nongïalam shnong bad wat ka Raid hi baroh kawei.
Kala ong ba kane ka kompani kam shem la pynshai paidbah ruh halor kane ka project ban pynpoi gas pipeline hynrei la shu leh public hearing tang bad ki katto katne ki trai jaka.
Kane ka seng kala buh jingkylli na ki bor pynïaid District ba kumno katei ka kompani ka lah ban pyntrei ïa kane ka project khlem da pyndep ïa ka public hearing kaba paka bad khlem ka jingtip jong u paidba.
Namar kane, ka HITO ka la dawa na ki bor pynïaid District ba kin tuklar mardor ïa kane ka kompani bad ban phah sangeh shisyndon ïa ka jingpyntrei ïa kane ka project.
