Shillong, K’lyngkot 07: Ka Hynniewtrep Border Disputed Redressal Forum (HBDRF) ha ka sngi Thohdieng ka la phah tuklar ha ka Meghalaya Human Rights Commission (MHRC) halor ka jingkynnoh pynkhein ia ka hok longbriew manbriew da ka sorkar Assam ia ki paidbah ka Labang Nangphyllut ha West Jaintia Hills district.
Ha ka shithi sha u chairperson ka MHRC, ka forum ka la ong, “…ngi kyrpad ia ka National Human Rights Commission ba kan tuklar halor ki mat kham kloi katba lah khnang ba ka Sorkar Jylla ne ka Sorkar Pdeng kin don ia ka jingsngewkhia jong ki briew ka thain .”
Ka la ong ba hapdeng ki snem 2000 haduh 20017 -18 ngut ki nongshongshnong ka Labang Nangphyllut ki la mad shibun ki jingshah thombor ha ka kynhun lehnoh Karbi ba la tip kum ka Karbi National Volunteer (KNV) Karbi People Liberation Tigers (KPLT) Karbi Longri Raikom Asong (KLRA) United People Ka Democratic Solidarity (UPDS) bad kiwei kiwei.
“Kine ki kynhun kaikhlaw kila dawa pisa hapdeng T.1000 haduh T.5000 na kawei ka ïing kum ka House Tax man la u snem. Ki dawa ruh shibun ïa kito kiba don lyngkha kba bad ki masi kum ki muid bad kiwei kiwei. Ki ju wan rung shapoh ki shnong ki thaw bad knieh ïa ki mar ki mata kynthup ia ki masi, ki syiar, blang, masi, sniang, kba, jhur bad kiwei kiwei. Ki leh ruh ia ki kam khlem akor pyrshah ia ki kynthei bad ki khynnah, ki la shoh bad lehbeiñ ruh ïa ki khynnah shynrang bad iauwei u briew uba la kham rangbah khlem kano kano ka jingbakla bad khlem ka jingisynei,” ong ka shithi.
Ka la ong ruh ba namar kine ki kam runar jong kine ki kaikhlaw Karbi ki paidbah kane ka thain ki la hap ban iehnoh ia la ka jong ka ka iing ka sem bad phet sha ka shnong Sahsniang ha u bnai Nailar 2003 kaba la tip kum ka, “Sahsniang Refugee”. Ia kane ka jingphetwir la tip kylleng ka ri lyngba ki khubor bad kiwei kiwei ki jingpyntip.
“Ha kane ka por, baroh arngut ki Myntri Rangbah ka Assam bad Meghalaya, u Dr, D.D Lapang na Meghalaya bad u P. K Mahanta na Assam ki kular ïa ki paidbah ka Labang Nangphyllut ha Refugee Camp ban pynbeit ïa u pud u sam bad ban pynkynriah biang ïa kane ka jaka sha ka jylla Meghalaya hynrei kane kam shym la urlong satia,” ka la ong haba bynrap “Ynda ki la wanphai sha la iing bad shnong naduh 2019 na kine ki jaka rieh ba shipior, la jan baroh ki iing jong ki ki la shah pynjulor, ki lyngkha kba bad jaka rep ki la shah pynjulor bad baroh ki mar ki mata bad ki jingdon jingem jong ki ki la duh noh Ki iakynduh ia ka jingeh kaba khraw namar kim don jaka sah ym don jain ym don bam bad kiba bun ki briew ki la iap thngan bad shah jingit. Wat hadeng kine ki jingjynjar bad jingsngewsih baroh kim shym la ioh jingiarap ne jingkyrshan ei ei na ka Sorkar.”
Ka Forum ka la ong ba kijuh ki jingjia ki la jia ha ki bnai Naitung bad Nailar 2015, lyngba ka jingshah thombor jong ki kynhun runar Karbi pyrshah ia ki paid Khasi-Jaintia. Da ki hajar ngut ki paid Karbi kila wwan rung ha ka shnong Madan myn-i , Mooriap , Mookhim bad kila thombor’ ia ki khlem ka jingmap. Ha kane ka kynti ruh, ki paid Khasi Jaiñtia ki la hap ban phet sha ki shnong ba marjan jong ka Meghalaya ba kynthup ha Mooluber, Khanduli , Lapangap, Saitsama , Namdong ha Jowai.
