Shillong, Iaiong 13: Ka seng saiñ pyrthei Voice of the People’s Party (VPP) hynne ka sngi Saitjain, kala ujor da ka ejahar pyrshah ia u/ka trai jong ka ‘Ka Sur U Myndie Iaka Ri Ka Jaitbynriew’ kaba la shna hapoh ka ha Facebook.
U Bah Danny Langstieh u Finance Secretary bad Election Agent ka VPP ula ujor ia katei ka ejahar ha u Superintendent of Police (SP) ka East Khasi Hills.
Katkum ka ejahar ka VPP kala pyntip ba u/ka trai jong ka Page ‘Ka Sur U Myndie Iaka Ri Ka Jaitbynriew’ kala leit ban kynthoh kulmar ha ki Social Media bad ha ki lad pathai khubor ba pynmih ha ki Youtube.
“Ngi la iohi ba u/ka trai jong ka Page ‘Ka Sur U Myndie Iaka Ri Ka Jaitbynriew’, la thoh ia ka kyntien ‘Prah’ wat ha ki khubor iap briew” la ong ka ejahar.
Ka VPP kala pyntip ruh sha u SP halor ka jingdon ki riewshimkabu kiba kynthoh kulmar iaki nongialam niam da ki kyntien khlem akor bad da ka pynbud ia ka kyntien ‘Prah’.
Haba iadei bad kane, ka VPP kala kyntu ia u SP ban leh ia kaba donkam namar kane ka pynjah burom ia ka Party kaba don hapdeng ka jingiakhuh ha ka ilekshon MP Lok Sabha 2024.
Nalor kane ka VPP kala ujor ejahar ruh pyrshah ia ka @jsyiemliehmaduh413 bad @FahvasFahva-me7yk kiba la kynthoh da ktien khlem akor ia u nongialam niam na ka Balang Catholic.
Ha ka ejahar ka VPP kala pyntip ba @jsyiemliehmaduh413 bad @FahvasFahva kila kynthoh da ki kyntien khlem akor ia u nongialam niam na ka Balang Catholic ha kawei ka Video ba mih ha YouTube. Ka VPP kala dawa naki bor Pulit ban leh ia kaba donkam namar kane ka pynjah burom iaka Party bad ban pynshitom ia kiba kynthoh kulmar ha ki kyndon Indian Penal Code, 1860 bad Information Technology Act, 2000.
 hynne ka sngi Saitjain, kala ujor da ka ejahar pyrshah ia u/ka trai jong ka ‘Ka Sur U Myndie Iaka Ri Ka Jaitbynriew’ kaba la shna hapoh ka ha Facebook.){kind=link}