Shillong, Rymphang 22 :Ka kurim u MLA ka AITC na Umroi Bah Geoge B Lyngdoh, ka kong Therezia A Syiem, kala mudui da ka ejahar sha ki Pulit halor ka jingkynnoh ba ka shah thombor bad shah patrong jubor ha ka kynhun ki runar ha ka step phyrngap jong ka sngi Nyngkong.
Kat kum ka ejahar, kane ka jingjia kala jia habar ka Iingsah jong une u MLA kaba don ha Umroi Labansaro. Ia kane ka ejahar la mudui ha Khapmara PIC, Ri-Bhoi District.
Ka Kong Therezia ka pyntip ba ka kynhun ki runar kila thombor bad byrngem ia ka lem bad ki para jong ka ha kane ka miet. Ka iathuhba watla kala pyntip sha ki Pulit ba kin wan ai jingiarap hynrei ki Pulit kim shym la wan satia.
Kat kum ka jingong jong ka, kawei ka kali kala wan pynieng habar iing jong ka ha ka por 12.30 baje ryngkat ka sur jingtem kaba sawa jam. Haba iohi ia ka, kine ki runar kila tim la tla bad kumta hi kala phone ia ki Pulit haduh arsien hynrei ki Pulit kim shym la wan satia.
Namar ka jingbym lad shuh, ka pyntip ba kala leit shajan katei ka kali ban kyrpad ba kin pynrit ia ka sur jingtem namar ba I Khun ba dang lai snem im da shait da khlain. Hynrei, kine ki runar kila patrong jubor pynban ia ka shapoh ka kali haduh ba kala mong ha ki katto katne ki bynta ka met.
Ka pyntip ba haba ki para kila mih ban iarap ia ka, kine ki runar kila phet noh bak na katei ka jaka. Ki bahaiing hasem kila pyrshang ban behthong ia kine ki briew hynrei haba poi ha Umroi Nongrah, kila shah khang lynti ha bun ngut ki briew bad kine ki runar ruh kila jrong kti shuh shuh ia ka bad ia ki para jong ka.
“Ha kane ka jingshah shoh, kine ki runar kila ktah kti bad jrongkti ruh iaka jinglong kynthei/ uwei u briew ia ka ula kynjat na kawei ka kjat katba kiwei ki dang kynshoit ia la ki paralok ban pyniap ia u para jong ka…da kaba the da u tyllai na rynsang bad patan ia u sha u paidbah” ong ka ejehar.
Ka iathuh ba hadien ka jingiohphet na kane ka jaka bad ioh wanphai shala iing ha Umroi Labansaro, kine ki runar kila beh nadien bad leit hylla biang hakhmat iing ban pyndik ia ka Longiing jong ka. Ka ong ba wat hadien kane, kala phone biang haduh arsien ia ki Pulit hapdeng ka por 3-4 baje hynrei kim shym la phah satia ia ki Pulit ban wan ai jingiarap bad jingiada na kane ka kynhun ki runar ba don hakhmat ka Iing jong ka.
“Ka paw kumba ki Pulit ki leh khnang ban nym wan mih khnang ba kine ki runar kin ioh ban leh ia ki kam pyntriem. Ka long kaba sngewsuh ban kdew ba jin ba ki Pulit kila shimkhia ia ka jingpyntip bala ai da u kurim jong nga, kine ki runar kin jin da la shah kem baroh halor ka jingpynkulmar, jingktah kti bad jrongkti ia ka jinglong kynthei” ong kane ka Longkmie ha ka ejehar.
Kala pyntip ruh ba kane ka jingjia kala jia tan ghadien katto katne sngi hadien ka jingsaphriang ka jingthoh ha Whatsapp ba kyntu ia ki briew n aka shnong ban pyntip sha ki ba u MLA Bah George B Lyngdoh ula leit rung man ki thliew iing ha ka thain.
