Shillong, Nailur 22 : Ka kynhun kieng atiar Hynniewtrep National Liberation Council (HNLC) hynne ka sngi u Blei, kala pynshai ba u Sromwell Mawdoh ym dei satia u dkhot ka HNLC uba la pyndem wait noh, kumba la mih ha ki katto katne ki lad pathai khubor.
Katkum ka kyrwoh na u Bah Saiñkupar Nongtraw u General Secretary bad u Publicity Secretary ka HNLC, ula pyntip ba u Sromwell Mawdoh ym dei satia u dkhot ka HNLC uba la pyndem wait noh, hynrei ula shah kem ha u bnai Jylliew 2015 kum u dkhot ka HNLC.
Ha ka sien ka baar, kaba ki pulit kila kem ia u na ka iingsah ka jong u, kila kynnoh ba udei u Over Ground Worker (OGW) jongka HNLC. Ka jingkynnoh pyrshah ia u Mawdoh da ki pulit ka long ka bym don nongrim bad ngi kyntu ia ki bor sorkar ba kidei ban pynbiang ia ki sakhi ki sabut kiba paka ban pynskhem ia ka jingkam ka jong ki halor ka jingdon jingiadei ka jongu bad ka HNLC.
“Nga lah iohi ha ka Facebook bad lyngba kiwei pat ki tyllong khubor ba u Mawdoh ula pyni ia ka jingthrang ban iakhun iaka elekshon MDC ban wan. Ka tnad pulit ka kwah ban pyniap bad ban pynthohbria ia u Bah Mawdoh ha ki lad pathai khubor ban pyni ia u kum u ksuid hashwa ka elekshon. Ka jingleh jongki pulit ban pynthohbria ia u Bah Mawdoh da kaba pynngat jubor ia u, ba u don jingiadei bad ka HNLC ka long kaba pynklumar. Ka paw ba ka tnad pulit kala sdang leh kum ka kynhun ki runar, da kaba pyrshang ban thombor ia ki riewshimet kiba dang samla ha ka kyrteng jong ka jingbat ia ka ain ka kanun. Ha ka jingshisha, kadei ka kynhun jongki nongleh ia ki kam be-ain, ki nongleh thok, ki nongpyniap briew bad ki nongthok nongshukor” ong u Bah Sainkupar.
U Nongialam ka HNLC ula iathuh ba ha u snem 2010, haba u Paristone Pakyntein@Pudo ula shah kem ha ki BSF, ka pulit ka jylla ka Jyoti Wahlang kala leit iakynduh ia ki ophisar ka BSF ban kyrpad ban aiti noh ia u Pakyntein sha ki pulit. Kala bthah ruh ia ki BSF ba kin ym ai kano kano ka jingpyntip sha ki lad pathai khubor hynrei ban ailad ia ka tnad pulit ba kan leh ia kaba donkam namar ba kadei kaba la tbit ha katei ka kam ban ai musli musla ha ryngkat bad ki 12 tylli ki jingber. Namar ka jingtbit ha kaban khleh ia ki musli musla, lah ban ong, ba ka tnad pulit ka lah ban pyndonkam ia kino kino ki buit ne ki jingiasylla ban pyntroin ia kano kano ka kynhun ne riewshimet ha ka por ba ki shah kem.
“Ha ka por jong u Emanuel Suchen ha Mawiong, u Justice T. Vaiphei ula leit iakynduh ia u ban kylli bniah ha kaba iadei bad u Bah Che halor ka jingkynnoh ba u donkti ha kaba jingpynbthei ia u IED ha Jaintia Hills bad Laitumkhrah. U Suchen ula pynthikna ia u Vaiphei ba u Bah Che ym don bynta eiei ha katei ka jingjia. Hadien kane, 3 ngut ki Myntri kiba kynthup ia u Conrad Sangma, Prestone bad u Lakhmen Rymbui, shimet kila leit iakynduh ia u Suchen ha Mawiong bad kila kylli jingkylli ia u ha kaba iadei bad ka bynta jong u Bah Che halor ki jingjia pynbthei IED. Wat haba u Suchen ula bteng ban kyntait, kitei ki myntri kila pynbor ia u ban ai ia ki jingphla kiba thok ban pynngat ia u Bah Che. Kum ka bainong halor ka jingkohnguh ka jongu, kila kular ban ai kam bad ban ai jingiarap da ka pisa. Kala pawshai na ka jingpyrshang ka Star Cement ban poi sha u Emmanuel ban tyrwa ai kam ia u, ba ka don ka jingiadei kaba iajan bha hapdeng ka sorkar jylla bad ka Star Cement” la pynpaw u Bah Sainkupar.
Ula iathuh shuh shuh, ba hadien ba u Emanuel ula pyndem wait la ialam noh ia u sha Mawiong, ha kaba u SP Jagpal Singh ula wan poi bad ka byrngem ban shim ia ka jingim jongu Emanuel bad ula shoh ruh ia u bad kumta ula mynsaw bad shitom. Hadien 3 bnai jong ka jingshah bat ha Mawiong, ka NIA kala pynkynriah noh ia u na ka phatok ha Jowai sha Delhi naka bynta ban pynlong ia ka jingtohkit ha kaba ula mad iaka jingshah pynshitom kaba shyrkhei bha. U Emanuel ula don ia ki dak mynsaw ha ki bynta jong u ryndang, ki shympriahkti bad syngkai. Ia mynta la pynphai biang ia u sha ka HNLC bad u dang don hapdeng ka jingshah sumar bad ngi kyrmen skhem ba un ioh noh kloiu ia ka met kaba koit ba khiah.
U Emanuel Suchen, udei u dkhot ka HNLC ha u snem 2003, udei uba don akor bad uba tbit ha ki kam pynbthei bad uba kloi ban trei bad aiti na ka bynta ka dawbah jong u Hynńiewtrep.
“Husiar sorkar, ngi lah wanphai biang. Wat nym khein sting ia ka jingkhlain ka jong ngi. Ngin thwet ia phi ha man la ka shi kam, ngin pynthud iaka jingsuk bad ka jingkput kan long halor ka miej. To maham namar ka syrngiew jong ka jingpynshitom kan long kaba iar. Ki pop kiba phi lah leh mynshwa kin ym ioh ban iaid lait khlem ka jingiakhun pyrshah. Ka por jong ka hok kadei mynta” la pynkut u nongialam ka HNLC.
