Shillong, Naiwieng 06: U MLA bad MDC barim ka Nongkrem u Bah Lambor Malniang la pynpaw ba u Mawnongrim uba la shah kynthoh laiphew jait ha ka rynsan ialap elekshon ha u snem 2023, mynta u la trei kam pura namar ba ka scheme Mahatma Gandhi NREGA ne ka bylla 100 sngi kala treikam hapoh ka shnong Madanriting.
U Bah Lambor ula pynpaw ia kane ha ka jingialang sngewnguh kaba la khot da ka dorbar shnong ha ryngkat bad ki lai spah tam ki nongbylla sngi ban ai khublei kyrpang ia u Bah Lambor uba la long u nongprat lynti ban pynioh ia ki ia kane ka scheme. Ia kane ka jingialang sngewnguh la pynlong ha Community Hall jong ka shnong Madanriting mynta ka sngi Palei.
Kumban shu kdew ka shnong Madanriting kala hap ha ka map jong ka Greater Shillong kaba mut hapoh ka jingpeit jong ka Shillong Municipal Board, hynrei da ka jingiakhun tyngeh u Bah Lambor Malniang ha ka por ba u dang long kum u MLA ban kren sha u Myntri ka Sorkar Pdeng ba peit ia ka tnad Rural Development mynta kala wan ban urlong.
Haba kren ha ka jingialang sngewnguh u Bah Lambor ula ong, ba dei ha ka por khlam COVID ula leit sha Delhi ban iakynduh ia u Myntri ka Sorkar Pdeng ban kyrpad ia u ban pynioh ia ka shnong Madanriting ia kane ka Scheme ne ka bylla 100 shispah ngi bad nga la leit ban kyrpad la kot haduh kumba 15 sien eiei haduh ban da ioh buh ia u mawnongrim.
“Ha ka por ba buh ia u Mawnongrim, kila don kiba kren ha rynsan ialap elekshon ba u maw nongrim ba buh u dei u maw nongrim ba shu wan ban pynbiej elekshon ia u paidbah tang ban ioh vote, hynrei nga shu pynpaw ba ka por kan sa batai bad mynta ka sngi ka por kala batai shai kdar ia kito kiba kynthoh pyrshah ban pynjah burom ia nga,” ong u Bah Lambor.
Shuh shuh u la ong, “Wat lada mynta ngam shym la long shuh uta u MLA ne u MDC jong phi hynrei uba kmen tam mynta dei ma nga, namar ba ka jingtrei shitom na ka bynta ki paidbah jong ka shnong Madanriting kala urlong bad satang katto katne por ka shnong kan sa kylla ka dur ka dar bad kan sa phyrnai”.
Na ka liang u Rangbah Shnong ka shnong Madanriting u Bah Ricky Evans Lygdoh ula ai khublei bad pynpaw ka jingsngewnguh ia u Bah Lambor Malngiang uba long u nongprat lynti na ka bynta ka shnong ban ioh ia kane ka scheme ba bylla shispah sngi.
Hadien ba ka shnong kala ioh bad sdang ban pyntreikam ia kane ka scheme, ka shnong ka kynduh jingeh namar ba ki don pat ki briew kiba wohdong wohnia bad kiba kynnoh bamsap ia ki nongialam shnong bad kumjuh ruh ia ki nongialam ka VEC bad ula pynpaw ruh ba ka shnong kan sa leh da kaba tyngeh ia kito ki briew kiba thmu pynjah burom ia ka shnong ka thaw, ula ong.
Na ka liang ki paidbah nongshong shnong kila ai khublei ia u Bah Lambor uba la pynioh ia ki ia kane ka bylla 100 sngi, kumta kila kyntu ia ki nong shong shnong ba kim dei ban klet ia u briew uba la leh bha na ka bynta jong ki hynrei kidei ban don ka jingsngewnguh bad ban ia burom mar kylliang ha ki kam baroh.
Kane ka bylla shispah sngi hapoh ka shnong Madanriting kala sdang mynta u snem bad ka mang pisa na ka bynta kane ka shnong ka long kumba T.84 lak tam bad ki briew kiba la don ia ka Job Card ki don kumba 348 ngut bad kane kala iarap shisha ia ki briew kiba duna ha ka ioh ka kot bad kaba la wanrah ruh ia ka jingkylla hapoh ka shnong ka thaw.
