Shillong, Jylliew 29 : Haba maham pyrshah ia ka jingshaniah tylli na ka kam tih marpoh khyndew, ka MLA ka Sutnga-Saipung Kong Santa Mary Shylla ha ka sngi Nyngkong kala ong ba ka East Jaintia Hills kan hap ban pynbun ia ki lad ki lynti ban kamai naba u dewiong “un nym neh junom”, bad pynbna ia ki jingthmu ban shna bha ia ki jaka ba don ki kshaid bad ki krem bym pat don ba poi briew ban kyntiew ia ki kam jngohkai.
“U dewiong un nym neh junom. Kine ki dei ki marpoh khyndew-Ngim lah ban tip haduh lano kin dang don bad haduh lano kin nym don shuh. Mynta u dei u dewiong, lashaiu lah ban dei u mawshun lane kino kino ki marpoh khyndew” ong ka Kong Shylla haba iakren bad ki nongthoh khubor.
“Nga kyntu ia ki paidbah jong ngi ban phaikhmat sha ki lad kamai shane shatai namar ngim lah ban shaniah beit tang na u dewiong” kala bynrap. Ka Kong Sylla kala ong ba ki kam jngohkai ka ai ia ka lad kaba neh ban kamai hapoh ka District.
“Ka kam jngohkai ka dei kawei ka bynta kaba ngi lah ban thaw ia ki lad kamai na ka bynta ki briew jong ngi. Ki don katto katne ki krem bad ki kshaid ha East Jaintia Hills ki bym pat don ba shem na ka bynta ki kam jngohkai. Nga la dep leit sorjamin dalade ha ryngkat ki nongshongshnong” kala ong.
Kala pynthikna ba kala pynkhreh ia ki jingtyrwa ban shna pynbha ia ki jaka ba don kine ki jaka jngoh kai ki bym pat don ba poi mano manor uh.
Hynrei kane ka MLA kala kyntait ban iathuh ia kine ki jaka bad ong “Ngam lah ban ai ha phi ia ki kyrteng jonng ki krem namar ki dei ki bym pat pynrung ha ka thup hapoh ki kam jngohkai. Hooid, ki dei kiba don ha East Jaintia Hills”.
Ka kong Shylla kala kyntu ruh ban pynbha noh mardor ia ki jaka kiba la pynjulor da ki kam tih dewiong.
“Ngi la tyrwa ia katto katne ki jaka ban shna pynbha pat ia ki. Tang mar syn ioh pyntreikam ia ki skhim ha kine ki jaka, ki paidbah kin nym don shuh ha ka jingma hadien habud” kala ong.
Halor ki jingtei, kala ong ba ka surok Jowai-Malidor kala kham bha hynrei kala maham pat ia ka jingma ha kane ka aiom slap.
“Nga kyntu ia ki paidbah ba kin phikir bha ha kum kane ka por, khamtam ban leit jingleit ha ka por mynmiet haba ther u slap” kala bynrap.
