Shillong, Rymphang 19 : U Symbud Myntri Rangbah Bah Sniawbhalang Dhar ula pynpaw ia ka jingsngewsih kthang halor ka jingkhlad kyndit jong u MP ka Shillong Dr Ricky AJ Syngkon bad pynpaw ba ka dei ka jingduh kaba khraw ia ka Jylla.
“Ha ka jingiakynduh bad iatreilang bad u, Nga shem ia u ba u dei u MP ba don burom tam, uba sngewrit shisha” ong u Bah Sniawbha. “U dei uba smat bha bad kham kongsan, u buh ia ka jingiapher sain pyrthei shadien bad u don ia ka thong bad ka jingiohi jngai ba kumno un pyntyllun shakhmat ia ka Jylla”.
U Bah Sniawbha ula pynkynmaw ia ka jingiakren khatduh bad u Dr Syngkon bad ong “U ong ha nga ba ngi donkam ban buh shadien ia ka jingiapher sain pyrthei bad to ngin ia tei lang ia kane ka Jylla ba itynnad jong ngi”.
Ula phah ruh ia ka jingsngewlem sha ki bahaiing hasem u Dr Syngkon bad ong “Nga phah ia ka jingsngewlem sha ki bahaiing hasem bad nga duwai ba u Blei un ai ka bor ha kum kane ka por ka jingduh ia la u baieid bathoin”.
U Bah Sniawbha ula bynrap “Ka jingkhlad jong u kam dei tang ka jingduh kaba khraw ia ka IIng ka sem bad ia ka party ba u mihkhmat, hynrei ka jingduh kaba khraw ia ka Jylla baroh kawei”.
