Shillong, Naiwieng 11: Ka kynhun ialehkai kriket ka Meghalaya ki la lah ban khur pat sa ia ka nam jop kaba ar ka jong ki, ha ka lympung ialehkai ka Men’s State A Trophy 2025-26 Plate Group, hadien ba ki la lah an pynliem da shi wiket pyrshah ia ka Manipur, ha ka jingiakhun ba la long ha Mohali, mynta ka sngi.
Haba beh ia ka thong kaba 193 ron, ki arngut ki batsman ba kham shadien duh, ki la lah ban ioh kamai lut ia ki ron a ki donkam na ka over kaba khatduh, kaba la biang pura ia ka Meghalaya ba kan don ha ka kyrdan ba ha khlieh duh ka meij iakhein point hadien ba ka la khur pura 8 point, kaba ha shwa ia kane, ki nong ialehkai ka jylla, ki la lah ban pynliem ia ka Sikkim.
Ka khana jong kane ka jingiakhun, ka long ba ka Meghalaya hadien ba ka la jop ia ka jingkynting pisa (toss) ka la ailad shwa ia ka Manipur ba kan wan ba kan bet (batting) ha kaba ka la lah ba kan kamai 192 ron na ki 49.2 over, kaba hangne u Manish Sharma (Left-arm orthodox spinner) u la lah ban lam khmat ia ka kynhun ban khur 3 wiket naka bynta 18 ron na ki 10 over, bynrap pat sa u bowler PM Santhosh uba la khur lem 3 wiket naka bynta 41 ron na ki 10 over bad bynrap da ka jinglah ban khur mar shi wiket da u Shavian Blah, Gavineal Marpna bad u Denikcheng Marak.
Katba na ka liang ki batsman ka Manipur, u Somokanta u la lah ban kamai 43 ron ha shwa ba un shah run out noh ha u Denikcheng.
Haba la dei ka pali ban wan beh ia kane ka thong, ka Meghalaya kam shim la lah ban ioh ia ka jingsdang kaba skhem, hadien ba ka la lap ba hap kynsan 3 wiket tang hapdeng ki saw tylli ki bol katta na ka 31 ron naka bynta 1 wiket sha ka 31 ron naka bynta 4 wiket.
Ha shwa ba kiei kiei kiba kham sniew kin wan ban jia ban hap ia ka Meghalaya, lap ba wan poi noh u Josiah Momin (42 na ki 62 balls, 6x4s) bad u Rohit Yadav (65 na ki 112 balls, 5x4s) ban seng ia ka nongrim kaba 83 ron naka bynta ka wiket kba saw, kaba pynlong syndon ia ka Meghalaya ba kan lait na ka tmier ka jingma, hadien kane, u Santosh u la lah pat ban kamai 32 ron na ki 55 tylli ki bol, kaba la nang kham pynjan shuh shuh ia ka kynhun ban kam sha u lain ka jingjop.
Hangne ruh ki wiket sa shisien ki la sdang ba kin khyllem biang, kaba pynlong ia u Gulgul Sangma (7 not out na ki 13) bad Denikcheng (9 not na ki 11) ban lam khmat ia ka kynhun ban jam sha ka jingjop ha ka bol ba nyngkong jonng ka over kaba 50.
