Shillong, Jymmang 25: Ka jingiaid lynti jong ka Meghalaya ha ka lympung ialehkai phutbol Swami Vivekananda U-20 Men’s National Football Championship 2025, ka la kut noh hynne ka sngi U Blei hadien ka jingshah rem ha ka Mizoram da 4-0 kol ha ka jingiakhun semifinal kaba ar ha Narainpur, Chhattisgarh.
Baroh arliang mamla ki la jop lut ïa ki jingïalehkai ba la dep hynrei ka la iaid kumba ar taiew tam naduh ba la ïohi khatduh ïa ka Meghalaya ba kan ïalehkai.
Ka Meghalaya ka la ïalehkai khatduh ha ka 9 tarik Jymmang, katba ka Mizoram ka la jop ïa ka Quarterfinal jong ka pyrshah ïa ka Punjab tang ha ka sngi Palei bad kumta ka don ia ka lad ban lah ialehkai bha haba wan sha ka jingiakhun semiphainal ba long hynne ka sngi U Blei
U Coach jong ka Meghalaya u Bobby L Nongbet u la pynïalehkai ïa ka kynhun kaba khlain hynrei ka kynhun kala shah pynliem noh ha ka Mizoram lyngba ki gol bala thep da u Mesak C Lalrinngheta (28’, 76’), u Dantes K Lalhriatpuia (83’) bad u F Vanlalchhanchhuaha (90’+2).
Watla ka Meghalaya kala shah pynliem hynrei mynta u snem ka la ïohi ïa ka jingkiew kaba khraw haba ïanujor bad ka jingïakhun ha u snem 2024.
Ha ka jingïakhun ha u snem 2025, ka Meghalaya kala jop ïa ka Rajasthan 4-0, Kerala 2-1 bad Bihar 7-0 haia group stage hashwa ban jop da 1-0 iaka Karnataka haka Quarter.
Katba ka Mizoram mynta kan iakhun pyrshah ia ka Delhi ha ka Fibal hadien baka Delhi ka la pynliem ïa ka Sports Authority of India da 4-0 kol ha ka jingïalehkai semifinal.
