Shillong, Lber 21: Ka West Jaintia Hills District Cricket Association kala pynrem iaka East Jaintia Hills DCA da 19 run ha ka U-15 Inter District Cricket Tournament 2023 Zone 1 kaba la long hyne ka sngi ha Umbuda, Ri-Bhoi.
Ha ka Zone 2 kaba la long ha Williamnagar, ka jingiakhun kala long hapdeng ka South Garo Hills DCA bad ka West Khasi Hills DCA hynrei kane ka jingialehkai kala kut noh ha ka jingiakhaid hynrei ka South Garo Hills DCA kala ioh iaka point namar ka jingtam bun ia ka run ha ka First Innings.
Ha ka Lah Sngi u Blei, ka EJH kala ioh ban kamai tang 20 run ha ka por ba ka tied nyngkong katba ka WJH kala kamai 12 run bad hap 1 wiket bad haba kala bteng ban tied biang ha ka sngi kaba bud ka WJH kala ioh ban kamai 120 bad hap 6 wiket bad kala ailad noh ia ka EJH ban tied biang.
U Eshan Siangshai bad u Maremdorkini Sutnga kila ia neh slem bad kamai 79 run, katba u Sutnga ula ioh ban kamai 36.
U Eshan Siangshai ula ioh iaka nam Player of the Match ha kaba ula tied haduh 52 run khlem da Out katba u Siyon Sangma ula long u nongkawang bol ba tbit jong ka EJH da kaba ioh khur 4 wiket bad ai 35 run.
Ka EJH kala donkam ban kamai 100 run ban pynbor ia ka kynhun pyrshah ban tied biang, hynrei watla kila ialehkai bha kila ioh ban kamai tang 81 run bad hap lut baroh ki wiket.
U Rohit Panday ula ioh ban kamai 30 run, katba u Namewanki Pakyntein uba lakawang bol ula ioh 5 wiket bad ai 18 run bad u Redolent Shadap ula ioh 2 wiket bad ai 10 run.
Ha kawei pat ka jingiakhun, ka SGH kala kamai 184 run bad hap baroh ki wiket ha ka Lah sngi u Blei, hynrei haba ka WKH kala tied haka sngi kaba bud kala ioh ban kamai tang 140 run bad hap baroh ki wiket.
U Dabetbhalang Kharjana ula kamai 59 run bad u Andrew Starfill Rani ula kamai 47 run naka bynta ka WKH hynrei ki paralok kiba donlang ha ka kynhun kim hsym la lah satia ban noh synniang ha kaban kamai run.
U Jyeipara A Sangma ula ioh 3 wiket bad ai 18 run bad u Christwar S Marak ula ioh 3 wiket bad ai 29 run.
Tang hapoh ka 31 over ka SGH kala kamai 239 run bad hap 8 wiket ha kaba u Christwar ula ioh ban kamai palat 136 run tam da kaba tied 15 tylli ki Four bad 10 Six na ki 96 Ball.
U Nongkawang bol u Arwanmeki Lyngkhoi ula ioh 5 wiket bad ai 64 run.
Ka WKH kala ioh ban tied 15 over hynrei kala ioh ban kamai 47 run bad hap shi wiket bad kane ka jingiakhun kala kut noh ha ka jingiakhaid.
Pule lang ia kane: Pyntip u DyCM ba la khot tender biang ia ka surok na Umshyrpi-Baniun
