Shillong, Nailar 25: U MP ka Congress na Tura, Saleng A Sangma, ula tyrwa sha ka Sorkar Pdeng ban pyniar bad pyniasoh ia ka Mendipathar railway station sha ki sor bah jong ka Ri kum ka Kanyakumari, Mumbai, New Delhi bad Kolkata.
U Saleng ula kyntu ruh ia ka Sorkar Pdeng ban wanrah ia ka rel kit mar ha Ri-lum Garo, haba kdew ia ka jingkongsan ka jingkiew irat ki kam karkhana bad ki nongsengkam sengjam ha ka thain.
“(Nga la kyntu ia ka Sorkar Pdeng ba kan mynjur) ba ka rel ba sted bha ka dei ban puniasoh ia ka Mendipathar sha Kanyakumari, sha Mumbai, sha New Delhi bad Kolkata…haba khmih ia ka jinglong jingman ka ri-lum Gari, nga la pan ia ka rel kit mar ia kaba u Myntri Rangbah Duh bad Myntri ba dei khmih, kila mynjur ba kin sa khmih ia kane ka kam. Tad haduh ba ngin da ioh ia ka rel kit mar na Mendipathar, ka ri-lum Garo kan nym ioh jingmyntoi na ka” ong u MP haba iakren bad ki nongthoh khubor ha ka sngi Nyngkong.
U Saleng ula kren ruh halor ki jingmyntoi ba bun bah ha ka ioh ka kot ka ban sa kiew bha da ka jing pyniasoh lynti rel, kynthup ki mar rep ba khlem khleh dawai na ri-lum Garo sha kiwei pat ki bynta jong ka Ri. Ula ong ba ki marrep ba khlem khleh dawai ka thain ki lah ban pyniaid iew ha ki sor bah, ka ban kyntiew bun shah ia ka ioh ka kot ka thain.
Kat kum ka jingong jong u, ka Mendipathar railway station ka treikam tang hapdeng ka Mendipathar bad Guwahati, khlem da don ia ka rel kit mar.
U MP ula pynpaw ia ka jingsngewkhia halor ka jingshngain bad ka jingrung kyrthep ki mynder lada pynpoi ia ka lynti rel sha kiwei pat ki jaka jong ka ri-lum Garo. Ula ban jur ia ka jingdonkam ban don ki jaka talasi ban pynthikna ia ka jingshngain ki trai shnong.
“Ha ka jingshisha lada phi iakren ia ka jingrung kyrthep ki briew ba nabar, ka rel ka rung tang 14 km haduh Mendipathar na khappud Assam bad haduh mynta kam pat da don than ka jingrung ki briew ba nabar hynrei lada ngi don ia ki lynti rel man ki jaka, lehse ngin hap ban khmih ia ka jingshngain ruh” ong u Saleng haba bynrap “Ta ka dawn gam shym la pan ban pynpoi ia ka lynti rel haduh Jengjal lane kiwei ki bynta ka ri-lum Garp hynrei nga shu kwah ban pan ban pyniasoh ia ka rel na Mendipathar sha kiwei pat ki kyndong kynshrot ka ri India”.
“Ngim pat don satia ia ki jaka talasi kiba biang. Ngam sngew dei ba ngan pan ia kata satang lad aka Sorkar ka don ia kiwei pat ki nongrim ban pyniar ia ka” ula bynrap.
