Shillong, Rymphang 20 : U Myntri Rangbah ka Jylla Conrad K Sangma ha ka sngi Ba-ar, ula pyntip ba ka Sorkar kala tyrwa ia ka mang pisa ba T. 30 klur ban seng ia ka Veterinary Hospital ha Upper Shillong.
“Ngi la phah ia ka jingtyrwa ba T. 300 klur hapoh ka Prime Minister’s Development Initiative for North East Region (PM-DeVINE)” ong u Conrad haba jubab ha Iingdorbar Thaw Ain.
Shuwa kane, u Nongialam ka Liang Pyrshah Bah Ronnie V Lyngdoh ula kyrpad ia u Myntri ka Tnad Animal Husbandry & Veterinary Bah A.L.Hek ban iakren bad u Myntri Rangbah Duh ka Ri ha ban seng ia ka Veterinary Hospital ha Jylla naba u dei u nongialam bala rim bha jong ka BJP na Meghalaya.
Kat kum ka jingong jong u, ka jingthmu jong ka Sorkar ban iarap ia ki nongrep da kaba sam ia ki khun sniang kala shah jop noh lada ym shim pat ia ki lad ban iada ia ka jingiap jong ki sniang hapoh ka Jylla.
U MLA ka Congress na Mawhati Bah Charles Marngar ula kyrpad ia ka Sorkar Jylla ban pyrkhat lem ha kaban buria ia ka jinglutksan ki nongrep namar ka jingiap ki sniang hapoh ka Jylla.
Halor kane, u Bah Hek ula ong ba kam pat don satia ka jingburia bala ai sha ki nongrep namar ki lah ban kam ia ka insurance ha ka dor ba T. 4000 uwei u sniang.
