Shillong Naiwieng 25: Ka Sorkar Jylla kala tyrwa ban phah sumar noh shabar ka Jylla ia ki arngut ki samla pule ka NEHU, kiba la mynsaw jur na ka jingjia aksiden ha ka 17 tarik u Naiwieng, ban pynthikna ba kin ioh ia ka jingsumar kaba paka lada jia ba ha jylla kim kot bor ban ai jingsumar ia ki.
Haba iakren bad ki nongpathai khubor hynne ka sngi Baar, u Symbud Myntri Rangbah Bah Sniawbhalang Dhar ula pyntip shaphang ka jinglong jingman jong kitei ki arngut ki samla pule kiba la mynsaw ha ka jingjia aksiden ha kaba ula ong, “Kawei kala kham biang katba kawei pat ka dang donkam shuh shuh ia ka por hapoh ka hospital”.
“Ngi kyrmen skhem ba kin sa ioh noh ia ka jingkoit jingkhiah” ula ong.
“Ka Sorkar Jylla kala dep ban phah jingtip, ba lada ka jingai jingsumar hapoh Shillong kam long kaba biang, dei ban pynkynriah noh ia ki khnang ba kin ioh ia ka jingsumar kaba kham bha” ong u Bah Dhar bad ka ai mynsiem ia ka jingai jingsumar hapoh ka Nazareth hospital.
Ka Daritngen Pohdukhei bad ka Stephanie Shadap kila mynsaw jur bad kila shah sumar hapoh ICU jongka Nazareth hospital hadien ba kila shah rat ha kawei ka kali kaba la pynher sted bha da u nongap pahara jong ka NEIGRIHMS u Permen M Sangma ha ka 17 tarik u Naiwieng.
U Sangma ula shah kem bad shah pynngat hapoh ki kyndon kiba iadei bad ka jingthmu ban shim ia ka jingim.
Ka MHRC ruh kala shim ‘suo motu’ halor ka jingkynnoh ba kala don ka jingpynslem ban ai jingsumar ha Shillong Civil Hospital bad kala bthah ia ka DHS (MI) ba dei ban pynlong ia ka jingtohkit.
