Guwahati, Lber 29: Ka sorkar Mizoram ka la tyrwa ia ka Assam ban sdang ia ka jingiakren hapdeng ki heh ophisar ha ka shiteng jong u bnai Iaiong ban weng ia ka jingiakajia pud kaba la slem bha hapdeng ki ar tylli ki jylla ba marjan.
Ka jingïakajia khappud hapdeng ka Assam bad ka Mizoram ka la long ka mat kaba khlem lah ban pynbeit la bun bun snem, ha kaba teng teng ka ju mih ki jingiakynad bad dang shen la sakhi ia ka jingiakynad ha khappud ha kaba ki bor pulit na baroh ar tylli ki jylla ki la ia siat kuli mar kylliang.
U Home Secretary ka jylla Mizoram, u Vanlalmawia, u la pyntip ba la phah ïa ka shithi sha ka Assam ha ka sien kaba saw, ha kaba la tyrwa ba dei ban pynlong ïa ka jingïakren ha ka kyrdan ki heh ophisar ha shwa ban ïakren ha ka kyrdan jong ki myntri sorkar ha Guwahati, bad ka Mizoram ka dang ap ia ka jubab na ka Assam.
U Vanlalmawia u la ban jur ba kine ki jingïamir jingmut ki long ban pynkhreh bad pyndep ïa ka nongrim bad ki rukom treikam na ka bynta ki jingïakren ha ka kyrdan myntri kiba hadien.
Katkum u home secretary, ha ka jingiakren ha ka kyrdan jong ki myntri sorkar kaba la long ha Aizawl ha ka 9 tarik u Nailar mynshem snem, la mynjur ba ka jingiakren ha ka kyrdan ki myntri sorkar ka dei ban long ym duna ia ka lai sien shwa ka jingiakren ha ka kyrdan jong ki myntri sorkar.
Haba jubab ia ki shithi kiba la dep, ka sorkar Assam ka la tyrwa kham mynshwa ban pynlong ia ka jingiakren ha ka kyrdan jong ki heh sorkar ha ka taiew kaba lai jong u bnai Lber, Hynrei ka sorkar Mizoram ka la hiar namar ka jingshong dorbar jylla bad ka jingwan jngoh jong u myntri kam pohiing ka sorkar pdeng u Amit Shah, u la ong.
Lai tylli ki distrik jong ka Mizoram kaba kynthup ia ka Aizawl, Kolasib bad Mamit, ki ïasam ïa u pud u sam uba jrong 164.6 km bad ki distrik Cachar, Karimganj bad Hailakandi jong ka Assam.
Ka jingiakajia pud hapdeng kine ki ar tylli ki jylla ka mih na ar tylli ki jingpynbeit pud ha ka por jong ki nongsynshar phareng. Ka Mizoram ka kam ba ka jaka kaba heh 509 square mile jong ka Inner Line Reserved Forest, kaba la pynbna ha u snem 1875 katkum ka Bengal Eastern Frontier Regulation (BEFR) 1873, ka hap hapoh ka jaka jong ka.
Katba ka Assam pat ka kam ia u pud u sam ba la buh ha ka map Survey of India jong ka snem 1933 kum u pud u sam jong ka riti synshar.
