Guwahati, Nohprah 05 : Ka Sorkar Assam kala tyrwa ban pyntreikam ia ka “Expressway” Project ba kot T.25,000 klur, ka ban khate ia ka por leit por wan na Guwahati sha Siclhar haduh 4 kynta.
Kane ka “Expressway” kan sdang na Guwahati bad kan iaid lyngba ka Umiam (Parapani) ha Meghalaya bad kan mih sha Silchar. Kane ka project kaba dang don hapdeng ka jingbishar jong u Myntri Rangbah Duh ka Ri Narendra Modi, kan pyn khlain ia ki lad pyniasoh bad iarap ia ka jingkiew shaphrang ka iot ka kot.
U Myntri Rangbah ka Assam Himanta Biswa Sarma haba kren hadien ka jingialang ka Kynhun Myntri ha New Delhi ha ka sngi Balang, ula kren shaphang kane ka project bad ki jingkylla ki ban wan lyngba jong ka hapoh ka thain.
“Kane ka “Expressway kan pyniasoh ia ka Guwahati sha Umiaid bad kan leit shaduh sha Silchar, kan pynduna haduh 4 kynta ia ka leit ka wan” ong u Himanta haba bynrap “Ka thong jong ngi ka long ba ngin pynurlong ia ka leit ka wan na Guwahati sha Silchar tang ha kajuh ka sngi”.
Kane ka Expressway kan dei shibynta jong ki project ba T. 1 lak klur ki ban sa pynbna da u Myntri Rangbah Duh ka Ri Narendra Modi ha ka Advantage Assam Summit, ka ban long ha Guwahati ha u bnai Rymphang.
“Kane ka Highway kan ym pyniasoh tang ia ki jaka sor hynrei kan plier uh ia shibun ki lad ki lynti” ong u Sarma haba bynrap ba ka lynti iaid na Umiam, ka jaka jngohkai kaba khring bha ia ki nongshangkai, la khmih lynti ba kan nang pyn khlain ia ki kam jngohkai bad pynkhlain ia ka jingiatreikam lang hapdeng ka Assam bad Meghalaya.
