Shillong, Iaiong 20: Ka Khun Hynniewtrep National Awakening Movement (KHNAM) kala bteng ban dawa naka sorkar jylla ba kadei ba pynduh noh shi syndon iaka Personal Interview ha ka jingthep kam ha ki kyrad B, C bad D.
“Ka sorkar India naduh u Snem 2016, lyngba ka Office Memorandum kala rai ban pynduhnoh ia ka Personal Interview haba thep kam sorkar ha ki kyrad group B, C bad D bad ha kajuh ka lynti ki 23 tylli ki jylla ka Ri India kila shim ia kajuh ka sienjam halor ka nongrim bad jingdonkam ban pynduhnoh ia ka jingthep kam be-ain, jingthep kam lyngba ka jingithuh myntri sorkar, jingithuh longheh longhaiñ bad jingthep kam lyngba ka jingthong pisa, khnang ba ki samla kin ym shah knieh ia ka hok jong ki” la pynpaw ka KHNAM ha ka kot lyngkdop kaba la sam hynne ka sngi sha ki paidbah.
Ka KHNAM kala pyntip ba naduh u snem ba la dep kala thoh sha ka sorkar jylla ban shim ia kijuh ki sienjam bad ban weng noh ia ka personal interview na Meghalaya bad dang shen ruh kala thoh bad dawa biang na kane ka sorkar MDA-2, hynrei ka sorkar kala shim sting ia kane ka jingdawa ka seng.
“Kane kam dei ka mat jong ka KHNAM marwei, hynrei kadei ka jingdonkam na ka bynta ka lawei ki samla ka Ri. Ngi iohi la bun ki samla kila duh jingkyrmen wat ban thep kam sorkar ruh, namar kata, ngin hap ban leh eiei ngim lah ban shu peitkai ia ka jingduh jingkyrmen ki samla ka Ri” la kdew ha ka kot lyngkdop.
Ka KHNAM kala pynpaw ba ka jingthoh ia kane ka kot lyngkdop ka long ban pynsngewthuh paidbah ia ka jingdonkam jong kane ka mat bad ban pynthikna ia ka rukom thep kam kaba khuid.
“Lada ngi iohi ba ka sorkar ka iai leh mynthi, ka seng kan khot da ka jingialang paidbah ka baheh bad lada donkam kan ujor da ka PIL” la pynpaw ka KHNAM.
Ka seng ka kyrmen skhem ruh ba lada ka pynlong ia ka jingialang paidbah halor kane ka mat, ki paidbah khamtam eh ki samla kin iasnohkti lang na ka bynta ban saindur thymmai ia ka lawei ki khun samla ka jaidbynriew.
