Nongpoh, Naitung 16 : Ka jinghap slap kaba dang bteng ha Jylla, kala pynshong synjor ia bun ki jaka ha kylleng ka Jylla bad wanrah ia ka jingtwa u lum bad pynkhyllem ia u dieng hapoh ka surok National Highway-06 ha thain Ri-Bhoi.
Kane ka jingjia kala jia ha ka janmiet sngi Nyngkong ha ka shnong Pahamrinai, kaba don hajan ka Nongpoh, Ri-Bhoi District.
Ha kane ka por ba jia ka jingtwa khyndew bad khyllem u dieng, la ong b aka don kawei ka trok kit mar kaba iaid lynti ha kane ka surok hynrei donbok kala shu lait da ka said na ka jingshah bhen ha une u dieng.
Ka National Highway Authority of India (NHAI) haba ioh jingtip ia kane, kala phah wut wut ia ki briew ban pynkhuid ia ka khyndew ba twa bad ban pom ia u dieng uba la thiah na shiliang ka surok sha shiliang, ban weng ia ka jingdheng kali kaba la neh kumba shi kynta eiei.
Namar kane ka jingjia, ia ki kali la hap ban pyniaid noh shipor na ka liang ka bym dei (wrong side) ban pynduna ia ka jingdheng kali.
Lah ban kdew, ki jingjia twa ki lum ha surok National Highway 06 ha Ri Bhoi District ki la iai jia na kawei ka por sha kawei khamtam ha ka thain naduh Ladlasharai, Umran, Umsamlem, Quiñine, Umling bad kiwei kiwei.
Namar kane, ki bor Sorkar kila bthah ia ki nongleit nongwan ba ki ban phikir bha ialade ban lait na kino kino ki jingjia ki ba sngewsih.
