Nongstoiñ, Nailur 14: Ka surok na Markasa sha Mawphanlur, kaba dei ka surok sha ka jaka jngohkai kaba khring bha ia ki nongshangkai suwari, kala khoh bad sniew ha kiba bun ki jaka kynthup ka thliew muri um kaba la twa na ka surok, ia kaba la kynnoh ba dei namar ka jingtrei torti jong u contractor ha ka por ba u siang rong.
Ka jingkynnoh trei torti kam dei tang ha ka jingsiang rong hynrei wat ha ka rukom thep ia ki hume pipe ha ki thliew muri ruh kumjuh.
Kane ka jingkynnoh kala mih naka jingpei thliew jong ka surok ha ka bynta ba dei ban siang hume pipe kaba don ha khlieh shnong Markasa. Kane ka jingpei thliew kala mih na ka jingbam ka um ia ka khyndew haduh bala pei syndon da ka thliew kaba heh.
U bah Bony Lyngdoh u nongpeit їa ka Mawphanlur Tourist spot haba їakren bad u nongthoh khubor, ula ong ba ka jingsdang sniew bad khohruh khohram jong ka surok kala ktah jur ia ka kam jngohkai ha ka thain bad pynpaw ba bun ki nongshang suwari kila salia ban wan namar ka surok.
Ula pynpaw ia ka jingdonkam ba ka Sorkar kan phah maramot noh mar mar ia kane ka surok ka ban wanrah ruh ia shibun ki jingmyntoi ia ki trai shnong lyngba ki kam jngohkai.
Une u Rangbah ula iathuh ba naduh ba ka sorkar ka la ithuh їa ka Mawphanlur kum ka jaka jngohkai kaba itynnad, um pat ju їohi wat shisien ruh їa u Director ne ki ophisar jong ka Tourist Department, ba kin wan sha katei ka jaka ban peit ia ki jing duna bad ki jingdonkam ban pynitynnad shuh shuh ia kane ka jaka shangkai.
Pule lang ia kane: Aipor 15 sngi ka Shnong Mawiongrim ia ka Sorkar ban weng ia u dewiong na surok bah
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
