Shillong, Nailur 14: Ka Dorbar Shnong Mawlai Mawiongrim kala aipor 15 sngi iaka ophis ka Deputy Commissioner (DC) ban weng noh ia u dewiong bala pyllang harud ka surok bah ka ha don ha Mawlai Mawiongrim.
Ia kane la pyntip da u Rangbah Shnong ka Mawlai Mawiongrim bah S. Lyngdoh uba la ong ba lada ki bor district kim weng ia une u dewiong, naka liang ka Dorbar Shnong kan shim da kiwei pat ki sienjam.
Haba kren sha ki lad pathai khubor hadien ka jingkynduh iaka DC, u bah S. Lyngdoh ula iathuh ba une u dewiong ula don ha kane ka jaka mynta la 8 snem tam bad ka jingdon une u dewiong ka buh jingeh iaki nong shong shnong namar ka la pynjaboh ia ka umbam umdih, ki pung dohkha bad ia ka mariang baroh kawei.
“Kum ka Dorbar Shnong ngi sngew khia namar ka jingdon u dewiong bala pyllang palat 8 snem tam ha kane jaka kaba la buh jingeh iaki nong shong shnong bad dei namar kane ngi la ai por 15 sngi iaka ophis DC ban weng noh ia u dewiong na kane ka jaka, lym kumta ka Dorbar Shnong ka shim da kiwei ki sienjam ba tyngeh” la ong u bah S. Lyngdoh.
Haba kylli, u bah S. Lyngdoh ula ong “Naka liang ka DC kala kular ban lilam noh ia une u dewiong hapoh 1 taiew bad naka liang ka Dorbar Shnong ruh kan iai buddien ia haba iadei bad kane ka kam”.
U Consultant ka Shnong Mawlai Mawiongrim u bah A.Kharshandy ula ong baka Dorbar Shnong ka sngewkhia haba iadei bad kane namar kane ka jaka ka lah long kum ka jaka ia die iathied dewiong khamtam eh ha ka por synnia namar ka ju don ka por ba u dewiong u dap bad hadien kumba katto kattne por u jah hi noh.
