Shillong, Naiwieng 13: Ki 21 tylli ki Shnong na West Khasi Hills, hynne ka sngi Balang, kila wan tur paidbah sha ka Ophis treikam ka Khasi Hills Autonomous District Council ha Shillong, ban pyrshah jur ia ka jing pyn beit pud thymmai ia ki constituency jong ka Council, kaba la ktah jur ia kine ki shnong.
Kine ki Shnong kila pyrshah jur ba ka KHADC kala pynkynriah noh ia ki na ka Mawshynrut constituency sha ka Rambrai-Jyrngam constituency.
Ia kane ka jingwan tur paidbah sha KHADC la ialam da ka Joint Action Committee jong kine ki 21 tylli ki Shnong kiba hap hapoh ki lai tylli ki Polling Station ka Mawshynrut-ka Misei, Mawsmai bad Langdongdai.
Lah ban kdew ba dang shen ha ka jingialang ba long ha Langdongdai, kine ki 21 tylli ki Shnong bala lamkhmat da ka JAC, kila rai ruh ban nym iashimbynta satia (boycott) ha ka elekshon MDC ka ba lah ban long ha u snem ban wan.
Ha kane ka jingwan sha KHADC, ki paidbah jong kine ki 21 shnong kila shong kyllain mungor syndon ha khyrdop jong ka Council bad ruh hapdeng jong ka surok iaid kali ha Garikhana, kaba la khang lynti syndon ia ka leit ka wan jong ki kali kynthup ki kali arshaka.
Ki nongiashimbynta kila rah ruh ia ki placard kiba don ia ki jingthoh “Pynneh ia ngi ha Mawshynrut”, ” Ko Selection Committee wat pyneh Dohnud, sngap iaka jingdawa jong ngi”, “Iaka hok u paidbah la kdiah da u Chairman ka Selection Committee” haba pyrta slogan “PN Syiem Down Down”.
Ia ka khubor ba pura yn sa pyllait hadien.
