Nongstoiñ, 29 Nailur: Ki Samla ka sor Nongstoin hynne ka sngi Thohdieng, kila tur sha ka Ophis u Deputy Commissioner, West Khasi Hills ban pynpaw iaka jingpyrshah halor ka hukum ban pynkhuid ia ka Wah Nonbah bad Iew Nongstoin ha ka 1 tarik Risaw, kaba dei ka sngi U Blei.
Kine ki samla kiba rah bad ki placard kila pyrta slogan ba dawa ia u DC ban pyndam ia katei ka hukum.
Lah ban kdew hangne, kane ka jingpynkhuid shnong ha ka sngi U Blei ka dei kaba la khot pynlong da u Myntri Rangbah Duh ka Ri Narendra Modi kum shibynta ban rakhe ia ka Gandhi Jayanti.
Namar ka jingpyrshah ba ka dei ha ka sngi U Blei kaba ki Khristan ki khein kyntang, ki samla kila dawa ia une u Khliehduh ka District ba u dei ban pynsangeh ia ka hukum.
Hadien katto katne por, u DC ula khot iakren ia kine ki samla shapoh ka Ophis treikam bad ula pynshai ia ka jingthmu jong kane ka kam.
U bah D. Sun haba iakren sha ki lad pathai khubor hadien bala mih na ka kamra u DC, u la ong ba na ka liang jong u DC u la pynshai sha ki ba um lah ban ai hukum thymmai ban pynkynriah ia katei ka prokram hynrei u la ong pat ba kam don kano kano ka jingpynbor bad ka nym don ruh kano kano ka jingpynshitom ia ki bym treh ban wan iashim bynta ha katei ka sngi.
