Shillong, Nailur 30: Namar ka jingpynslem ka Sorkar Pdeng ban ai jingithuh ne ban pynrung noh ia ka Ktien Khasi hapoh ka Khyrnit ba phra jong ka Riti Synshar ka Ri, ka Khasi Author Society hynne ka sngi Saitjain, kala pynlong pat sa ia ka jingiakhih da kaba iashong kyllain mungor ha Jantar Mantar, Delhi ban pynbor ia ka Sorkar Pdeng ba kan pynkloi noh ia ka kam.
Ia kane ka jingiakhih ka Khasi Author Society, la kyrshan da ka Hynniewtrep Delhi Association lem bad ka Khasi Students Union, Delhi, kiba la iamih paidbah ban iashimbynta ha kane ka jingiakhih ba jai jai hapoh kane ka Nongbah jong ka Ri India.
Lah ban kdew hangne ba ka jingdawa jong ka Khasi Author Society ban pynrung ia ka Ktien Khasi ha ka khyrnit ba Phra ka Riti Synshar ka Ri kala kynjoh sha ka 40 snem eiei bad hynnin ka 29 tari Nailur, kane ka synjuk kala pynlong ia ka National Seminar ha Delhi ban iatai kumno ha kaban wanrah ia ki buit ban lah pynsngewthuh ia ka Sorkar Pdeng ba kan ain oh ia ka jingmynjur.
Ha kane ka jingiakhih ha Jantar Mantar, la wan ruh ban iashimbynta da ki Myntri Sorkar kiba kynthup ia u Bah Paul Lyngdoh bad ka Kong Ampareen Lyngdoh, u Lamphang barim ka iingdorbar thawain ka jylla Bah Metbah Lyngdoh, u Chairman ka KHADC Bah Lamphrang Blah, u Nongialam ka Liang pyrshah ka KHADC u Bah TW Chyne, ki MLA bad ki MDC.
Nalor kine ki riew sainpyrthei ka Jylla, ki Nongialam Sengbhalang na Jylla kiba kynthup ia ka KSU, FKJGP, RBYF, HYC, JSU, CORP, HANM bad kiwei kiwei, kila iadonlang ban pyni ia ka jingiatylli kum ka Jaidbynriew ha kaban lah pynurlong noh ia kane ka jingangnud kaba la slem bha.
Ia ka khubor ba bniah yn sa pynmih hadien.
