Nongstoin, Nailur 24 : Ki paid Nongshongshnong ka shnong Ksehkohlong, ha ka sngi Nyngkong, kila iatur paidbah sha ka Ophis u Syiem ka Hima Myriaw kaba don ha Nongkasen, ban dawa ai syrnod noh ia u Bah Amborlin Lyngkhoi kum u Sordar uba ka shnong kala dep jied dang shen.
Kane ka jingiatur paidbah kala wan jia hadien ba ka Ophis u Syiem, kala kyntait ban ai syrnod ia une u Sordar ba thymmai.
Kane ka jingjia kala jia ruh ha ka sngi kaba u Syiem ka Hima Myriam Bah K Syiem, ula khot iakren ia u Sordar barim Bah Ioannis Lyngkhoi, u Sordar ba shipor Bah RS Khardewsaw lem bad u Sordar ba dang shu jied thymmai u paidbah Bah Amborlin Lyngkhoi.
Ki paidbah kila pyrshah jur ia kane ka jingkhot iakren jong u Syiem bad dawa ba u Syiem u dei ban ai Syrnod ia u Sordar ba thymmai.
Ki paidbah kila pyrta bad ia hylla slogan ha phyllaw ka Ophis u Syiem kat haduh ba ki bor District ka Eastern West Khasi Hills ryngkat ki Pulit, kila hap ban wan tem ia u paidbah.
Kat kum ka jingiathuh ki trai shnong, kumba ju leh man ka por, ka Shnong ka ju buh ryntih ia ka samoi treikam kaba lai snem kynthih ia ki nongkitkam shnong bad hadien ba kut ka samoi, la ju pyntymmai ia ki nongkitkam naduh u Sordar bad kiwei kiwei da kaba iaid ne pyndep kat kum ka rukom pyniaid ia ka kam jied Sordar.
Ki pyntip ba ki nongshongshnong kila ai ruh da ka jingthoh sha ka Ophis u Syiem ba dawa pynlong biang ia ka jingjied Sordar da kawei lada ka Ophis u Syiem kam sngew lah ban pdiang ia u Sordar bala jied da u paidbah. Hynrei la kynnoh ba ka Ophis u Syiem kala sngap jar jar bad kam shym la ai jubab satia bad thung pynban da u Sordar ba shipor, kaba la pynbitar ia u paidbah.
