Nongpoh, Jymmang 25 : Ki paid Nongshongshnong ka shnong Kdong Hulu, Ri-Bhoi District, kila leit tur paidbah hynne ka sngi Palei sha ka Ophis treikam ka MePDCL ha Umiam, ban pan jingpynshai halor ka jingpynduh bording elektrik ia ka Shnong la jan kot shibnai.
Ki paid Nongshnong kane ka Shnong hapoh ka jingialam ka Kong Iaishah Rymbai, kila iakynduh ia ka Superintendent Engineer ka Ri-Bhoi Distribution Circle Kong A Majaw, ban pynsngew ruh ia ki jingeh ba ki paidbah ki iakynduh na kane ka jinghap shongdum khlem bording elektrik jan shibnai lynter.
Haba iakren bad ki nongthoh khubor, ka Kong Iaishah kala pyntip ba naduh ka janmiet 3 tarik Jymmang 2023 tad haduh mynta mynne, ka shnong Kdong Hulu kala shongdum namar ka jingbym ioh bording elektrik.
Ka pyntip ba shisngi hadien ba duh ka bording, ki bor pyniaid shnong kata naduh ka 4 tarik Jymmang, kila leit ban pyntip ia ka jingduh boring sha ki Ophisar ka Tnad MePDCL ha Umiam hynrei kane ka Ophis kam shym la shimkhia satia ia ka kam, kaba la buh ia ka jingeh ia ki paidbah nongshongshnong khamtam ki khynnah pule.
Ka kong Iaishah ka pyntip ba ka Superintendent Engineer kala iathuh ba ka daw ka jingduh bording ha katei ka shnong ka dei namar ka jingduh noh jong u Transformer, uba la dei ban bujli noh da uba thymmai. Kala pyntip ba ka jingbujli kan sdang shimpor sa kumba 10 sngi eiei.
