Shillong, Naiwieng 22: Ki Nongshong dukan madan ka Shillong hynne ka ,sngi Thohdieng, kila iatur paidbah sha ka Ophis treikam ka Shillong Municipal Board (SMB) ban pan jingshai halor ka jingthmu ban pynkynriah ia ki dukan madan na Khyndailad.
Kane ka jingtur ki nongshong dukan madan, kiba bun kidei ki longkmie, kadei halor ka nongrim ban leit pan jingpynshai naka SMB halor ka jingthmu ban pynkynriah ia kumba 200 ngut ki nongshong dukan madan shaki 3 tylli ki jaka baka Sorkar kala dep ban ithuh.
Ki nongdie madan kila iaid kjat naduh Khyndai Lad sha Ophis treikam ka Shillong Municipal Board (SMB) ban pan jingpynshai na u CEO, uba don mynta sha Tura.
Lah ban kdew hangne, ka Sorkar Jylla kala pynbna ban pynkynriah noh ia baroh ki dukan madan na Khyndailad hapoh une u bnai Naiwieng da ka jingthmu ban pynlong ia ka Khyndailad kum ka jaka iaid kjat jong ki briew (Pedestrian Zone).
Haba iakren bad ki nongthoh khubor, ka President ka Meghalaya & Greater Shillong Progressive Hawkers and Street Vendors Association (MGSPHSVA) kong Biolin Pyrtuh kala iathuh ba ka kynhun kala iakynduh ia u Executive Engineer ka SMB bah FB Chyne ban pan jingpynshai halor ka jingkren u Myntri ka tnad Tourism Bah Paul Lyngdoh ba ka Sorkar kala pynkhreh nadong hadong ban pynkynriah noh ia ki nongshong dulan madan kiba shong dukan naduh Motphran haduh Khyndailad hapoh ka 24 tarik Naiwieng.
“U Myntri ula kren ia kane watla u tip bha ba ka don ka Committee, kaba la thaw ban khmih ia kane ka kam bad ki nongshong dukan madan ruh ki dei ki dkhot ka Committee. Ngi kwah ruh ia u ban tip ba lada u (Bah Paul) kwah ban long u nongshong dukan madan, ngi pdiang ia u ban wan. Ngin da kmen eh ban ai jaka lem ia u” kala ong.
Haba pynpaw ba ki nongshong dukan madan ruh ki tip bha ia ka ain, ka Kong Biolin kala ong ba u Myntri ula dei ban kiar ialade na ka jingkren ia kane namar ba ma u hi u khlem lah ban leh eiei ia kane ka kam.
“Namar kata, ki nongshong dukan madan kim dei ban sheptieng hynrei ban shaniah ia ngi kiba dei ki dkhot ka Committee naba ngin sa shim rai ia ki jaka ban pynlong jaka shong dukan madan. Ngi kyntu ia baroh ki nongshong dukan madan ba kin leit phai biang shala ki jong ki am bad ki jaka” kala bynrap.
U Myntri ula pyntip dang shen ba ka Sorkar kala dep ithuh ia lai tylli ki jaka ha Khyndailad ban ai jaka shong dukan madan bad kine ki kynthup ia ka building ka MTC bad ka MUDA.
Haba kylli, ka President ka Association kala iathuh ba ka SMB kam don jingtip halor kane ka jingthmu jong ka Sorkar bad kam don jingtip ruh halor ki 200 ngut ki nongshong dukan madan ba kren da u Myntri. “Ka SMB kam don jingtp ia kane lehse ki dei ki bahaiing u Bah Paul Lyngdoh, ia kata hi ngim tip” kala ong.
Ka kong Biolin ka pyntip ba ki don palat 5000 ngut ki nongshong dukan madan kiba la dep pynrung kyrteng bad ka Associaton.
