Shillong, Jymmang 07 : Ki khun ki raiot ka Hima Sohra ha ka sngi Palei, kila iatur paidbah sha Khasi Hills Autonomous District Council (KHADC) ban dawa ia ka Executive Committee ka Voice of the People Party (VPP) ba kan ai sanat noh ia u Syiem Marremdor Syiem, uba la jied da ki Khlieh Nongsynshar ka Hima.
Ki khun ki raiot ka Hima kila ialumlang hajan ka Jingkieng Umshyrpi hashuwa ba kin iatur paidbah sha ka Ophis treikam ka KHADC ha Garikhana.
Ia kane ka jingiatur paidbah la ialam da ki Khlieh Nongsynshar ka Hima kiba kynthup ia ki Myntri, Sordar, ki Secretary Shnong bad kiwei kiwei.
Ki paidbah kila rah ruh ia ki placard ryngkat ka pyrta slogan ba ka KHADC ka dei ban ai sanad noh ia u Bah Marremdor Syiem kum u Syiem thymmai ka Hima Sohra, uba la jied bad mon da ki khun ki hajar ka Hima Sohra hadien ba khlad noh u Syiem Pa’iem Freeman Sing Syiem ha ka 31 tarik u Risaw 2025.
Ka phyllaw ka KHADC kala dap smam da ki khun ki raiot ka hima Sohra kiba dang ap ia u Chief Executive Member (CEM) bad ka Executive Committee ba kin khot iakren ban pynbeit ia kane ka kam.
Ka khubor ba dang shu ioh ka iathuh ba ka Executive Committee kala aiktien ba phah jied ia 10 ngut ki nongialam ba kin wan sha ka jingiakren hapoh ka Ophis.
Kum ban shu pynkynmaw, u Bah Marremdor Syiem u dei uba bat kum u Syiem Khynnah ha ka por ka jingsynshar u Pa’iem Freeman Sing Syiem bad hadien ka jingkhlad noh u Syiem, ka Hima ha ka 3 tarik Naiwieng kala jied ia u ban shimti ia ka khet kum u Syiem thymmai ka Hima.
Hynrei ka KHADC ka khlem ai jingithuh satia ia kane ka rai ka Hima bad ha ka 19 tarik Nohprah, ka EC ka VPP kala thung ia u Myntri Mynjurlang Majaw kum u Acting Syiem ka Hima Sohra da kaba pyntreikam ia ka kyndon 11 jong ka KHAD (Appointment and Succession of Chief and Headmen) Act, 1959.
Watla ka kynhun bala khein beain-ka Hynniewtrep National Liberation Council (HNLC) kala shimkhia ia kane ka kam bad ong ba ka KHADC kala pyndonkam bakla ia ka kyndon 11 jong ka Aapoint and Succession of Chief and Headmen Act, 1959 tang ban kyntait ia u Bah Marremdor Syiem bad ban ioh thung ia u Acting Syiem.
Ha ka email, ka HNLC kala jam ruh ia u pud ban byrngem ia ki dkhot ka Executive Committee ka KHADC lada ki dang bteng ban pynslem ban ai jingithuh ia u Bah Marremdor Syiem kum u Syiem ka Sohra.
 ban dawa ia ka Executive Committee ka Voice of the People Party (VPP) ba kan ai sanat noh ia u Syiem Marremdor Syiem, uba la jied da ki Khlieh Nongsynshar ka Hima.){kind=link}